Isabulin 65 - AKITUTUKET NAKITETET (NEPEPEKA ISABULIN KA AWARAGASIA)

Akitur ka Akiyalama

Namaka kalo epolokiit ekiruke. Ekiruke ka Daudi. Ekiruke.

¹ Itemokina siong' akitur ijo ko Sayon, Okwai Akuju; ka akisomakin ijo nu esumunikisi siong' ijo,

² naarai ipupi ijo alipasia. Ebunete itung'a kang'olo wai nama kon

³ kanuka arokusio kes. Kikarikisi siong' ariokusio kosi, irumakini ijo siong'.

⁴ Erereng' ng'ini ni iseuni ijo, ka ayauni nama apie, akiboi ko otogo kon! Ibunete siong' akilesikin ka ajokus naka etogo kon lokalaunan!

⁵ Kokipone kaloka asomisio kon kanukapolok iiranari ijo siong' ka ayuun siong', Okwai Akuju loka ayuuno kosi, ijo nes ayuuno naka iboro kijokin, kakwap kiton akarin.

⁶ Ipiaki ijo imoru alaro kes kagogong'u kon, itodiarito agogong' kon na epolo.

⁷ Isinapakini ijo aruore naka ang'ololon, nepepe ka acela naka ikokoron keng'; itililing'i ijo acela ka itung'a.

⁸ Eumokiit akwap kere asomisio kon. Eyauto asomisio kon ailel ageun kowai kepe kaloka akwap anang'akin wai loce.

⁹ Idari ijo akwap kokipone kaloka akijukun akiru. Itabara ijo akwap ka ainakin abositait noi. Ileleba akipi ocori kon; iinakini ijo akwap iraan. Lo nes ekipone lo itenia ijo akwap.

¹⁰ Ijukunene ijo akiru na epolo noi ka akitapapal; itononokenene ijo alipo ka akaswet, ka akisulwanyikin iraan kopoloutu.

¹¹ Inaki ijo ekaru kere ajokun kon, ng'ini ilaro ni ibu ijo kitoro, abutu inyamen kojaikinosi kakipuakus.

¹² Ileleba ibaren onya; ileleba ailele omoru.

¹³ Ileleba amerekekin amaata; ileleba engano ajelukon. Ituri ng'in ibore ka ailel.