Isabulin 63 - AKITUTUKET NAKITETET (NEPEPEKA ISABULIN KA AWARAGASIA)

Akote Akuju

Ekiruke ka Daudi, na ajaare nesi moding' loko Yuda.

¹ Okwai Akuju, irait ijo Akuju kang', ekote etau kang' ijo. Ekote etau kang' ijo bala itwan ni aarit akure; eirarit eong' ekure kwape ka amana kana ewonit komam akipi.

² Kanuka ng'un akoo eong' ijo ko otogo kon lokalaunan; kanyu eong' kwape ijaatatare ijo ka agogong' nepepe ka akibusesu.

³ Ejokuna noi amina kon na emam esial akilanya akijar, ebuni akituk kang' akitur ijo.

⁴ Abuni eong' akiyalamikin ijo apaarasia kere nuka akijar kang'; ekiari eong' akanin kang' elipi eong'.

⁵ Abuni eong' akinyama ka akilesikin bala itwan ni ejii opucit loka inyamen kalu ejooka, bobo kalakara abuni eong' ekiruke ikirukesinoi luka akiturite ijo.

⁶ Aperi eong' kapetat, eitunene eong' ijo; akwaare kere awomowomoe eong' kuju kon;

⁷ naarai ing'araki ijo eong' ng'in pak. Kotoribe ka abenokoka kon erukokini eong' kotoma ailel.

⁸ Eminaikina eong' nama kon, kedari eong' akani kon nakoteten kojokan.

⁹ Ng'ulu lu etamakiito akiyara eong' elosete kwap namaka lukatwak.

¹⁰ Ebunio akiyara kesi kileng'ia, bobo eraunete kesi inyamen ka ipeene.

¹¹ Konye ebuni ejakait alakari kanuka Akuju; ng'ulu lu isumunikinete kokiror ka Akuju ebunete akitur nesi, konye akituke kiliokoisik ebunio akigolo.