Isabulin 6 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote aking'arasit kotoma apak naka Ican

Nama kalo epolokiit ekiruke: Itosomae iboro luka aunoi; atupa ka Eseminit. Ekiruke ka Daudi.

¹ Okwai Lokapolon, mam akiretakin eong' kotoma anyunyura kon! Kere akitisilaar eong' kotoma anyunyura kon!

² Kitimoi eong', Okwai Lokapolon, kapasa eong'; Koinak eong' agogong'u; kapasa eong' cut Okwai Lokapolon, kitang'aleune eong', naarai icanasi akojoo kang'.

³ Emoyo kang' de icana cut. Okwai Lokapolon, apak na etia ai?

⁴ Kobong'u Okwai Lokapolon, koyuu akijar kang'; koyuune eong' kanuka amina kon na emam esial.

⁵ Naarai kotoma atwamare mam kiituute ijo; ng'ai ebeikini akiturite ijo kang'ina.

⁶ Kapasa eong' akituur; ng'ini akwaare etapapali eong' ka akio ijam kang' etapapala eong' ekicolong' kang' kakimonyo kang'.

⁷ Amunaun akong'u kang' kanuka akituur, itolosit amunaun kanuka ipading'atin kang'.

⁸ Kolomasi kama kang', osi lukesomak aronus; naarai eira Lokapolon akimonyo kang'.

⁹ Eira Lokapolon alipasia kang'; nuka aking'arasit bobo ebong'okini alipasia kang'.

¹⁰ Itisilikino ipading'atin kang' kere bobo isicanio noi; ebong'orete kesi kau kosodete akitisilikin kesi atipet.