Isabulin 50 - AKITUTUKET NAKITETET (NEPEPEKA ISABULIN KA AWARAGASIA)

Akimaa naka abeite

Ekiruke ka Asaf.

¹ Inera Lokapolon, Akuju loka Apedor kere; iworit nesi akwap kere ageun ko kide adolore too.

² Ecae Akuju alomun ko Sayon, ere lokapolon lo elae noi.

³ Ebuuti Akuju wok, konye mere etatii; ejii akimi na enoki noi king'aren keng', imanakiit nesi ekuwam lo epolo noi.

⁴ Enyarit nesi kuju nepepe ka akwap bala lukajenak akitere nesi etubokini itung'a keng'.

⁵ “Kotukok nama kang' itung'a kang' lu emunokina, ng'ulu lu etenete ka eong' akitutuket ka alemun isuban.”

⁶ Elimori kuju adolite keng', naarai erait Akuju elope lokatubonokinan!

⁷ “Kiirasi Okwai itung'a kang', kasodi eong' ejori; Okwai Israel, alimori eong' nukarokok kuju kus. Eong' Akuju arait, Akuju kus.

⁸ Mam eong' keretanakini osi kanuka isuban kus; ejaasi idutan kus lukicwaa king'aren kang' ng'in pak.

⁹ Mam eong' kediauni emong'o epede alomun kamaata kus kere de akinei alomun kosipan kus;

¹⁰ ityeng' kere lu ejaasi toma amoni eraito lukang' nepepe ka akituk nu ejaasi kuju aritai ka imoru.

¹¹ Ikwenyi kere lu ejaasi moding' eraito lukang' nepepe ka iboro kere lu ejarete lu ejaasi amaata.

¹² Kere keirarit eong' eteng'e tia mam eong' kalimokini ijo, naarai akwap nepepe ka ng'ini ibore ni ejii toma keng' erait ni kang'.

¹³ Anyemenene eong' akiring' naka imong'in, kere de akimat aokot ka akinei?

¹⁴ Kodut Akuju isuban luka akiyalama, bobo kotaca akiapo kon nama kalo Eliliara noi;

¹⁵ bobo konyarautu eong' apak naka icani; abuni eong' ayuuni osi, bobo ibunete osi akiturite eong'.”

¹⁶ Konye lukarokok ebala Akuju, “Anyena adolite ejaasi ka osi alimonor ikisila kang'? Inyo ineratatar osi kuju ka akitutuket kang'?

¹⁷ Ing'erito osi aruaro; bobo ipiakinete osi akiro kang' kau kus.

¹⁸ Kianyutu osi ekokolan, iraito osi ipoupatin keng'; bobo iupasi osi ka itung'a lu edote.”

¹⁹ “Ilokokina osi ng'ini pak ejori nukarokok; mam osi cut kikuriaka ejori aliokonu.

²⁰ Ilokokina osi ejori nukarokok kuju ka ikanacan kus, bobo iinanakinete osi onac kusi aronus namam kejii.

²¹ Isomata osi iboro lu kere, konye ata eong' tii, kimunito osi ebe aputosi eong' ka osi. Konye kipokona keretakini eong' osi ka akiwosa osi.”

²² “Kopuputu nu, osi lu imuruonokinete Akuju, along'u amudiari eong' osi, bobo emamuuni itwan iyuuni osi.

²³ Ng'ini ni eyauni akiyalama bala isubanit keng' einakiit eong' akibusesu, ng'ini ni eruari eroto keng', etodikini eong' alakuno ka Akuju.”