Isabulin 49 - AKITUTUKET NAKITETET (NEPEPEKA ISABULIN KA AWARAGASIA)

Abang'anut naka amunokiite Abara

Nama kalo epolokiit ekiruke. Ekiruke ka Isapa ka Kora.

¹ Kiirasi nu, osi itung'a kere! Kopuputu osi kere lu iboete ka akwap,

² lukapolok nepepe kalucik, lu ebarito kalu epalipalito.

³ Ebuni akituk kang' ejori acoa; awomowomosia nuka etau kang' eraunete akijen.

⁴ Ayari eong' akit kang' akipup awaragan adauni eong' akapolok kang' ka akiram arupepe.

⁵ Mam eong' kakuriana ka apak kanaka icani, na kerimokitere eong' ipading'atin,

⁶ itung'a lu emunokiito abara kes bobo kipogasi kanuka abara kes kana epolo noi.

⁷ Teni emam itwan cut ebeikin alakun ilope; kere akitaca Akuju etyae loka akijar keng',

⁸ naarai etacenit ka akijar keng' icasit, bobo mam cut kilesikin,

⁹ ebe ebeikini nesi akitolosite akijar ikaru kere, bobo mam anyun adwi.

¹⁰ Teni, anyuni nesi ebe atikere luka acoa etwakete, nepepe ka ibang'aisik ka lu idang'adang'ara. Inyekinete kesi kere abara kes ka idwe kes.

¹¹ Eraunete atesin kes ireria kes ikaru kere; iboyete kesi kang'ina ikaru kere, atikere apaaran ape kejaasi kesi ka amaata kes ka ikulopek.

¹² Mam apolou wok kirebokini oni atwanare; ejii oni atwanare bala ityeng'.

¹³ Kitete nu isomakinosi nama kang'ulu kalu emunokina kesi ikulopek, esial ka ng'ulu kalu ilesikina kanuka abara kes —

¹⁴ ejii kesi atwanare bala amerekekin, bobo erauni atwanare nakejokon kes. Ebunete nu edolito akilanya kesi. Ebosete awate kes atipet kotoma akwap ka lukatwak nama elwana alomar koreria kes.

¹⁵ Konye ebuni Akuju alakun eong'; ebuni nesi alakun eong' ka apedor kanaka atwanare.

¹⁶ Mam ariang'un ebari itwan, na iyatare abara keng';

¹⁷ mam nesi kebeikini ayaar abara ng'ini ka nesi na etwaania nesi; mam abara keng' keuparosi ka nesi ates.

¹⁸ Atikere kilesikina nesi ka akijar kana bobo kitamaete nesi kanu itolositere nesi kojokan,

¹⁹ imorikikinosi nesi ka lukasonya keng' kotoma atwanare, nama mam akirionus kedaun.

²⁰ Mam apolou wok kirebokini oni atwanare; ering'a oni kitwakete bala ityeng'.