Isabulin 48 - AKITUTUKET NAKITETET (NEPEPEKA ISABULIN KA AWARAGASIA)

Sayon, Ere Lokapolon loka Akuju

Ekiruke. Ekiruke ka isapa ka Kora

¹ Epolo Lokapolon bobo iles ikina akiturite nesi noi kore ka Lokapolon ka Akuju wok! Emoru keng' lokalaunan,

² auja bobo ajokuna; erait nesi ailele naka akwap kere, Emoru loko Sayon, kong'alakimak, ere lokapolon loka Ejakait kalo epolo noi.

³ Etodia Akuju ebe ejii akidaro toma keng' toma ang'opesia nuka ere lokapolon.

⁴ Kotukokinosi ijakaa nenipe kosodete abunore alomikin Emoru loko Sayon.

⁵ Konye na aanyunata kesi Sayon, abutu kesi koumokisi; Kokuriakarosi kesi kosodete amotar.

⁶ Abu akurianu na epolo noi kikamu kesi, bala aberu na aaput akidoun ikoku,

⁷ bala amelin nu ibung'ae ekuwan lo epolo noi.

⁸ Eirasi siong' nu esoma Akuju, bobo aanyutu siong' kipokona kore ka Akuju wok, Lokapolon Loka Apedor Kere; ebuni nesi akidar ere lokapolon ikaru kere.

⁹ Kotogo kon, Okwai Akuju, iitunenete siong' kuju ka amina kon na emam esial na mam kedaun.

¹⁰ Kiturete itung'a ijo kang'olo wai, bobo ajenun ajokun kon ka akwap kere. Ipugae ijo kadolite;

¹¹ kinyek itung'a luko Sayon kolakarosi! Atubonokin kon itemokina; kojaikin ailel oreria lukapolok luko Yuda!

¹² Itung'a ka Akuju, kilaata Sayon bobo kimarata akitesin keng';

¹³ kiteoto kojokan arwatan bobo kwanyanasi nama eng'opiananata itung'a, tetere ibeikinete alimokin auri na etupakini:

¹⁴ “Akuju na erait Akuju wok ikaru kere; ebuni nesi ayaite oni ka aparasia kere nu ebuuto.”