Isabulin 46 - AKITUTUKET NAKITETET (NEPEPEKA ISABULIN KA AWARAGASIA)

Ejaasi Akuju ka oni.

Nama kalo epolokiit ekiruke. Ekiruke ka Isapa ka Kora. Atupa ka Alamot. Ekiruke.

¹ Erait Akuju etolim ka agogong'u wok, elokokina aking'arakin kapakio kanuka icani.

² Kanuka ng'unu mam oni kikuriakarosi, atikere kibelokin akwap atikere kijang'ajang'akinosi imoru kotoma otau ka akare;

³ atikere kirurumaete akipi keng' bobo kokuyete, kicekete imoru ka akijang'ajang'a.

⁴ Ejii ang'olol na eyaut alakara ore lokapolon loka Akuju, otogo lokalaunan kalo Eliliara noi.

⁵ Ejii Akuju ore ng'olo lokapolon, bobo mam kemudiaro cut; ebuni nesi ayuuni ere ng'olo taparacu cut.

⁶ Akuriakarosi akwapin, ejang'akinosi akwapin; Ireta Akuju, kosodi akwap akipirisaar.

⁷ Ejaasi Lokapolon Loka Apedor kere ka Siong'; Erait Akuju ka Yakobo nama ing'opitetere siong'.

⁸ Kobuutu kwanyutu nu esoma Lokapolon. Kwaanyutu iboro luka akitim lu esoma nesi ka akwap.

⁹ Irebonokini nesi ejie ka akwap kere; ebilibili nesi akabwai ka amunaunun akwaras ka akicwe ibukui.

¹⁰ Ebala nesi, “Kinyekisi ejie, kojenutu ebe arait eong' Akuju, lo epolo akitelekar ka akwapin, lo epolokiit akwap.”

¹¹ Ejaasi Lokapolon Loka Apedor kere ka oni; Akuju ka Yakobo erait nama ing'opitetere oni.