Isabulin 45 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akitur ejakait komanyit

Nama kalo epolokiit ekiruke: Kwape ka ikorom. Amaskil ka Isapa ka Kora; ekiruke loka amina.

¹ Ipasara akiro nukajokak kotau kang', ajeuni eong' ekiruke lo kanuka ejakait. Eputosi ang'ajep kang' ka akalamut kalokegirigiran.

² Ibonotot ijo noi kokiliok kere; ebukokite asyanut opono kon; kanuka ng'unu esulwanyik Akuju ijo ikaru kere.

³ Koyenik ekileng' kon, ejakait loka agogong'; kotoma akibusesu kon ka ang'osibib.

⁴ Kikunyak king'aren kotoma akibusesu kodumu akilanya kanuka akidar adolite ka abeite! Kinyek akan kon nako teten kisisiak ijo akitolot kojokan!

⁵ Ekwaka ikojoi kon, edaadaete itawon ka ipading'atin kon; eluronokinete ijo akwapin kakejen kon.

⁶ Ebuni ajakaanut na ainak Akuju ijo akitoloto ikaru kere. Ipugae ijo itung'a kon kadolite;

⁷ imina ijo nu edolito bobo mam ijo kimina nukarokok. Ng'ini nes atenikina aseuna Akuju ijo bobo abukoki nesi ijo alakara akilanya ejakait kere.

⁸ Esaete inapen kon akinyet ka emira na ekukuny, kirukokiito ijo lukerukok kotogoi kalu ilimite ka amugwar ka itomei.

⁹ Apesur kijakaa nes aberu ace nuka ang'osibib nu isiriamete ijo, ajakait de egwoi koteten kon, enapit nesi esawabu lo elae.

¹⁰ Kiira Okwai akoku, nu enera eong', kimuruok itung'a kon ka ajena kon.

¹¹ Atemelele kon nes einakini ejakait akimuite ijo; erait nesi ejakait kon, kanuka ng'un itemokina ijo akiyong' nes.

¹² Einunete itung'a luko Taya ijo idutan; itung'a lu ebarito cut

¹³ ka abara kana egelegela. Itenite enaga keng' kesawabu.

¹⁴ Enapit nesi igoen keng' lu elaete noi eyaaro nesi nama ka ejakait, ka abekon keng', nu inyamito nesi, ajaasi agari keng'.

¹⁵ Eyaite kesi kotoma ailel nepepe ka alakara elomete kesi otogo ka ejakait.

¹⁶ Ijo, ejakait kang' ibuni ijo ajaikin ka isapa ipu lu ebunete akirum icolong'o kes ka papa kus araun ijakaa, bobo ibuni ijo akitaraun kesi lukepugak akwap kere.

¹⁷ Ebuni ekiruke kang' akitoloto ajena kon ikaru kere, bobo ng'ini itwan ituri ijo apakio kere nu ebuuto.