Isabulin 44 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akidario

Nama kalo epolokiit ekiruke. Amaskil loka Isapa ka Kora.

¹ Eirasi siong' kakii kosi, Okwai Akuju — alimokisi luka asonya kosi siong' nu kibuu ijo kisoma, kuju ka aumosia kanu kibuu ijo kisoma kapakio kes, kapakio kanuka sek:

² Ekipone lokireng'iara ijo elope itung'a lu kemam keminasi ijo ka akigwaakin itung'a kon akwap kes; ekipone lo kisicania ijo akwapin nuce ka ainakin itung'a kon akitolot kojokan.

³ Amam itung'a kon ayarete akwap ka ikileng'ia kes kalukaujak; mam kesi elanyete ka agogong'u kes; arait ka apedor kon ka agogong' kon, arait kanuka ajaus kon ka kesi nes etodiari ebe ijaasi ijo ka kesi.

⁴ Irait ijo ejakait kang' ka Akuju kang'; inanakini ijo itung'a kon apedor naka akilanya,

⁵ bobo akitor apedor kon, nes elanyata siong' ipading'atin kosi. Akitor okirori kon nes epudarata siong' lu arukitetere siong'.

⁶ Mam eong' kamunokiit akabwa kang', kere de ekileng' kang' lokaujan koyuu eong';

⁷ konye iyuu ijo siong' kamaka ipading'atin kosi ka akilanya ng'ulu lu ereito siong'.

⁸ Namaka Akuju nes epogatatar siong' emam esial. Bobo ainakinete siong' ekiror keng' akiyalama ikaru kere.

⁹ Konye kipokona ing'ere ijo siong' ka akinyekin kilanyai siong'; mam bobo ijo kilosete nenipe ka luka ajore kosi.

¹⁰ Ibu ijo king'araki siong' amotari kamaka ipading'atin kosi, kosodete kesi ayaari iboro lu araito luokosi.

¹¹ Ibu ijo kojalak siong' etubiotubio bala amerekekin; ibu ijo kisiarak siong' akwapin nu long'au.

¹² Ibu ijo kogwela itung'a kon kelope kikabel kidis bala itung'a lu kedit etyae kes.

¹³ Iteete ipadukotin kosi nu ibu ijo kisomak siong', bobo ekwenatatare kesi siong'.

¹⁴ Itarau ijo siong' lu ekwenar ka akwapin imung'mung'ete itung'a akwes kes enwang'ito siong'.

¹⁵ Mam keyong'ite eong' paran kere, bobo arapak asilut akonyen kang'

¹⁶ ka akiro nepepe ka anwang'it kalu karasete eong', ko pone kaloka alomikinata ipading'atin kang' nepepe ka ng'ulu lu kenyang'ak.

¹⁷ Esomakinosi nu kere kama kosi konye mam siong' kemuruokina ijo atikere mam song' kabilito akitutuket na ibu ijo kiten ka siong'.

¹⁸ Mam itauon kosi kebong'orito kau; kere akejene kosi alomar koroto kon,

¹⁹ Konye ibu ijo kinyek siong' kokiding' ka ityeng' luko moding' emam aking'arasit; ibu ijo kinyek siong' kakirionus kana apolo noi.

²⁰ Kere kimuruokiit siong' ekiror ka Akuju kosi kere aterar akanin kosi nama ka akuju kace,

²¹ tia mam Akuju kanyuuti? Naarai ejeni nesi nu eng'opito kotau.

²² Konye erait kanu kon nes arenenere siong' ng'ini pak, nes eyaritere siong' bala amerekekin nu etubio.

²³ Konyou, Lokapolon! Inyo ijotoo ijo? Kokwenyu! Mam acakar siong' ikaru kere!

²⁴ Inyo ing'opikiitere ijo siong'? Mam akimuruokin icani kosi!

²⁵ Edeunosi siong' ebirokina kwap; eminaikina siong' kwap.

²⁶ Konyou, kobuu king'arak siong'! Koyuune siong' kanuka amina kon na emam esial!