Isabulin 42 - AKITUTUKET NAKITETET (NEPEPEKA ISABULIN KA AWARAGASIA)

EKITABO LOKIYAREIT Isab 42—72 Akilip ka itwan kani ejii ong'atune

Nama kalo epolokiit ekiruke. Amaskil loka isapa ka Kora.

¹ Kwape imuitere amori ecor loka akipi kanu etaasi ci, nes kemuitere eong' ijo, Okwai Akuju.

² Imuit eong' ijo, Akuju lo ejari; iwori alosia eong' kasodi akimaa koking'aren kon?

³ Akware ka apaaran amonyi eong', bobo akio bon nes inyamen kang'; ng'ini pak ing'isito ipading'atin kang' eong', “Ai ejii Akuju kon?”

⁴ Etacanar etau kang' keitu eong' nu atuboto na alosiata eong' ka akwap ka itung'a otogo ka Akuju kasodi eong' aking'arenikin kesi elosete, akwap ka itung'a na alakara, irukosi bobo ecelasi iturete Akuju.

⁵ Inyo imojakinar ijo etau kang', Inyo ituuria ijo kotoma kang'? Komunok Akuju; naarai abuni eong' bobo akitur nesi, aking'arasit kang'

⁶ ka Akuju kang'. Ebilakina etau kang' kotoma kang', kanuka ng'unu eituni eong' ijo alomun kakwap kanako Yordan kiton nako Ermon, alomun ko omoru kaloko Misar.

⁷ Abukokin eong' akale ka akipi, aapu akale naka akipi nesi ing'alaut atianar nakitetet.

⁸ Icorakini Lokapolon amina keng' na emam esial paran; bobo kware ejaasi ekiruke keng' ka eong', akilip nama ka Akuju loka akijar kang'.

⁹ Eng'isi eong' Akuju, lo igang'it eong' ebe, “Inyo imuruokina ijo eong'? Inyo etolositere eong' akinyama ican alomun kamaka ipading'atin kang'?”

¹⁰ Eriya eong' araton kes, itolosito kesi aking'isite eong', “Ai konye ejii Akuju kon?”

¹¹ Inyo imojakina eong' etau kona? Inyo eturia eong' kona? Inyo ecanare eong' kona? Amunokini eong' Akuju, bobo abuni eong' akiturite nesi, lokeyuunan kang' ka Akuju kang'.