Isabulin 41 - AKITUTUKET NAKITETET (NEPEPEKA ISABULIN KA AWARAGASIA)

Akilip kotoma adeka

Nama kalo epolokiit ekiruke. Ekiruke ka Daudi.

¹ Erereng' ng'ulu lu epodosi kuju ka lukapalapalak; ing'arakini Lokapolon kesi ejaasi kesi ocani.

² Ebuni Lokapolon akidar kesi ka akitajar kesi; ebuni nesi akitalakaar kesi ka akwap; mam nesi kinyekini kesi ka akanin ka ipading'atin kes.

³ Ing'arakini Lokapolon kesi edekasi kesi ka akitang'alaeun kesi.

⁴ Abu eong' katema, “Esoma eong' aronus koking'aren kon, Lokapolon; kisoni eong', bobo kitang'aleu eong'.”

⁵ Inerasi ipading'atin kang' akiro nukarokok kuju kang'. Ekotosi katwana eong' bobo kimuruokine eong'.

⁶ Ng'ulu lu ebunete anyun eong' mam kemunokina; irarete akiro nukarokok kuju kang' kosodete alosite alimonor ng'olo wai.

⁷ Ng'ulu kere lu ereito eong' iwewasi kuju kang', iitunenete nukarokok kuju kang'.

⁸ Ebalasi, “Erieba noi; mam cut kelomari kapetat keng'.”

⁹ Atikere ipoupa kang' nikajokan noi, ni amunokiit eong' noi, ni amorete ka eong' inyamen kang', ang'er eong'

¹⁰ Lokapolon, kisoni eong', bobo kinyaku akijar kang', bobo ataci eong' ipading'atin kang'.

¹¹ Mam kesi kelanyete eong', bobo ajenuni eong' ebe ilakara ijo ka eong'.

¹² Ibuni ijo aking'arakin eong', naarai esomae eong' nu ideerete; ibuni ijo akidar eong' kakonyene kon ng'in paaran.

¹³ Kiturwoto Lokapolon, Akuju ka itung'a kaluko Israel! Kiturwoto nesi kipokona ka ikaru kere! Ikote nepeneni! Ikote nepeneni!