Isabulin 40 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akiturite

Nama kalo epolokiit ekiruke. Ekiruke ka Daudi;

¹ Ka atitinyor eong' kanuka aking'arasit ka Lokapolon; kosodi nesi apupun ka akiirar akimonyo kang'.

² Kiriu nesi eong' alomun kotoma adwi nakaronon Kitogwoi nesi eong' kataaba kosodi nesi akidara eong'.

³ Kisisianak nesi eong' ekiruke lokitetet, ekiruke loka akiturite Akuju wok. Lu ipu lu aanyunete nu eyarete akikwenyarete kosodete akipiakin amuno kes nama ka Lokapolon.

⁴ Erereng' itwan ni emunokit Lokapolon, ni mam kebongori nama kalu ipogasi, namaka ng'ulu kalu elosete akimaa akujun nuka aliokonu.

⁵ Isomaki ijo siong' iboro lu ipu noi, Okwai Lokapolon Akuju kosi; emam ipede eputosi ka ijo! Isomaki ijo siong' akitemetemesio nukajokak noi. Amam eong' cut abeikiit ejori kuju kes kere — ipuaka kesi noi!

⁶ Mam ijo kikote isuban nepepe ka idutan, mam ijo kilipit ityeng' lu icweite kere kokuju ka altari, kere de isuban lu elemarete arokusio. Konye iinaki ijo eong' akii nuka akipup ijo,

⁷ kanuka ng'un, kenyakuni eong', “Eong' lo; acorasia kon kama kang' ejaasi okitabo loka Ekisil.

⁸ Akuju kang', amina eong' asoma nu ikote ijo! Egwait eong' akisisianakino kon kotoma otau kang'.”

⁹ Lokapolon, ka atuket ka itung'a kon kere, kalimoo eong' akiro nukajokak ebe iyuu ijo siong'. Ijeni ijo ebe mam eong' kenyekini alimonor akiro ng'unu.

¹⁰ Mam eong' kegwait Akiro Nukajokak nuka alakuno kotoma otau kang' bon; ener eong' ng'ini pak kuju ka amunokina kon ka aking'arasit kon. Katuket ka itung'a kon kere mam eong' kataut ti kuju ka ayong'ara kon nepepe ka amina kon na emam esial.

¹¹ Lokapolon, ajeni eong' ebe mam ijo cut king'eri akisoni eong'. Amina kon nepepe ka ayong'ara kon kedarete eong' ng'ini pak.

Akilip naka akote aking'arasit

¹² Irimokito eong' icani lu ipu noi — mam kimarunosi! Edong'osi eong' arokusio kang', adolore nama mam eong' kabeikini akitere; ipu noi akilanya itima luka akou kang', bobo adaun akicasite kang'.

¹³ Lokapolon koyuune eong'! King'arakine eong' kipokona!

¹⁴ Ng'ulu lu etamakito akiyara eong' kilanyai cut bobo kigurokinosi. Ng'ulu kere lu elakara kanuka ican kang' kinyakare bobo kitisilikine.

¹⁵ Ng'ulu lukakwenatatare eong' kokadakisi kanuka elanyere kesi.

¹⁶ Ng'ulu kere lu ebunete nama kon kolakara bobo kojaasi ka ailele. Ng'ulu kere lu iyalamasi kanuka alakuno kon ebalasi ng'ini pak, “Ikoni Lokapolon epolo ai!”

¹⁷ Okwai Lokapolon, mam eong' agogong', bobo apalipalit eong', konye mam ijo kimuruokini eong'. Irait ijo ekalakunan kang' ka Akuju kang' — kiburuburuun aking'arakin eong'.