Isabulin 4 - AKITUTUKET NAKITETET (NEPEPEKA ISABULIN KA AWARAGASIA)

Akilip naka ebong' naka akote aking'arasit

Namaka lokerukon: Itosomae iboro luka aunoi Asabulit ka Daudi.

¹ Kobong'okine eong' na eworokina eong', Okwai Akuju loka adolite kang'! Inaki ijo eong' agolot ajii eong' akituur. Kosiana kama kang' kipokona, bobo kiira alipa kang'.

² Okwai itung'a, eyari apak na etia ai icana ang'osibib kang' asilut? Iyarete osi apak na etia ai amina akiro nu emam adumunet, bobo akote aliokonu?

³ Kojenete ebe agita Lokapolon lu edolito araun itung'a keng' kelope, epupuni Lokapolon na anyarauna eong' nesi.

⁴ Konyunyura, konye mam asoma aronus; kicekete ka akurianu bobo kinyekisi asoma arokusio; kowomowoma cut kuju kanu, na iperiata osi etiiti kapetan kus.

⁵ Kolemutu isuban lu itemokina, bobo kigwakisi amuno kus namaka Lokapolon.

⁶ Ejaasi itung'a ipu lu ilipete: “Kiyataki siong' asulwanyi, Okwai Lokapolon. Kitee siong' ka asianut!”

⁷ Konye ailel na iinaki ijo eong' ilanyit na ebunete kesi adumun, ka ikinyom kes nepepe ka ebino.

⁸ Na aperia eong' kokwap, ajotonor eong' kotoma aipuc; ijo bon, Okwai Lokapolon nes kidari eong' kojokan.