Isabulin 39 - AKITUTUKET NAKITETET (NEPEPEKA ISABULIN KA AWARAGASIA)

Akimonyo kani icana

Nama kalo epolokiit ekiruke. Namaka Yedutun. Ekiruke ka Daudi.

¹ Abu eong' katema, “Abuni eong' acoikina ikamuut nu esomae eong' bobo mam eong' kaisikini akituk kang' ainakin eong' asoma aronus; mam eong' kalimuni ibore ipede ering'a itung'a lukarokok apete.”

² Abu eong' katau ti, mam kalimut akirot apede, atikere kuju ka ibore kere kani ejokuna! Konye abutu icani kang' kiyatakinosi,

³ kosodi akiyalolong' akitelekaar eong'. Ng'ini kere na awomowoma eong', nes eyatakinototor icani; mam eong' apalikin aking'isenene:

⁴ “Lokapolon, ajari eong' apak na etia ai? Iwori atwania eong'? Kolimokine eong' iwori eng'etakinore akijar kang'.”

⁵ Ituurian ijo koni akijar kang'! Kakonyen kon mam apak kanga naka akijar kerait ibore. Teni ng'ini ibore ni ejari mam eputosi ka akutar ka ekuwam,

⁶ mam kilanyit etoribe. Ng'ini ibore ni isomaete oni emam adumunet; itukete oni abara, konye mam kijenete ng'ai edumuni.

⁷ Lokapolon, inyena konye amunokin eong'? Epiak eong' amuno kang' nama kon.

⁸ Koyuune eong' karokusio kang' kere, bobo mam aisikin ibang'aisik akwenare eong'.

⁹ Atauni eong' ti, mam eong' kalimuni akirot, naarai ijo nes kiinakini eong' ecanakin ekipone lo.

¹⁰ Mam akisicana eong' bobo! Apu eong' atwanare kanuka ikondei kon.

¹¹ Itisilari ijo arokusio kosi kakiretanakin kon, bobo bala etapukan, imunauni ijo nu aminasi siong'. Teni mam siong' kelanyito akutun ka ekuwam!

¹² Lokapolon, kiira akilip kang', bobo kopup akimonyo kang'; kobu king'arakine eong' na amonyia eong'. Bala luka asonya kang' kere, arait eong' epejononi kon ka apak kana edit.

¹³ Kinyekine eong' tetere ajaikinosi eong' ka alakara adiosi ering'a eong' kaikara kasodi amamuun.