Isabulin 37 - AKITUTUKET NAKITETET (NEPEPEKA ISABULIN KA AWARAGASIA)

Esial kalukarokok nepepe kalukajokak

Ekiruke ka Daudi

¹ Mam akiyalolong' kuju kalukarokok; mam alilite kuju kalu isomaete nukarokok.

² Aaput kes awoli bala anya nu ewokito; etwakete kesi bala iraan lu erinyete.

³ Komunok Lokapolon, bobo kisoma nukajokak; kiboi ka akwap kojokan.

⁴ Kokou alakara kon kamaka Lokapolon, bobo einakini nesi ijo nu ekote etau kon.

⁵ Kipiak akijar kon namaka Lokapolon komunoki nesi, bobo king'arakini nesi ijo;

⁶ einakini nesi adolite kon acaun bala akolong' na ecae kiding' kaparan.

⁷ Kojaasi ka atitinyu bobo kidarau Lokapolon kisomak; mam akiyalong'ong'o kuju kang'ulu kalu ebarete kere ng'ulu lu itelekarete kakitemetemesio kes kanukarokok.

⁸ Mam acamun akiyalonong'o kere anyunyura; eyaunete ng'unu ican.

⁹ Ng'ulu lu emunokiito Lokapolon, erauni akwap nakes konye lukarokok ireng'iario king'a.

¹⁰ Apak na edit ageun kipokona ewoliete lukarokok; ibeikinete osi akote kesi konye mam osi kidumunete kesi;

¹¹ konye eyarete lu iyapeperasi akwap kosodete alelikin abara nepepe ka aipuc.

¹² Itemetemete itung'a lukarokok nukarokok kuju ka itung'a kalu ejoka ka akitere kesi ka areit.

¹³ Konye ekwenare Lokapolon itung'a lukarokok, naarai ejeni nesi ebe apuut kesi amudiaro.

¹⁴ Elemunete lukarokok ileng'ia kes lukaujak ka akudonokin imalia kes kanuka akiyara itung'a lukapalapalak, atubutubu ng'ulu lu isomaete nukajokak;

¹⁵ konye ebunio akiyara kesi kileng'ia kes kalukauja, ka kikulopek, bobo ebunio amunaun imalia kes.

¹⁶ Ejooka iboro lu edisiaka lu ejaasi ka itwan ni edolit akilanya iboro lu ipu lu ejaasi ka itwan ni isomae nakarokok.

¹⁷ Naarai elemari Lokapolon agogong' kalukarokok konye idari ng'ulu lu ejoka.

¹⁸ Idari Lokapolon ng'ulu lu eyong'ito nesi, bobo erauni akwap nakes ikaru kere.

¹⁹ Mam kesi kedumunete icani eroko apaarasia; ejaikinosi kesi kalu ilesikina kapakio kanuka akamu.

²⁰ Konye lukarokok etwakete; ewoliete ipading'atin ka Lokapolon bala aturo nuko moding'; ewoliete kesi bala apuru.

²¹ Ikopaete lukarok konye mam ketacete, konye itung'a lukajokak edutaka.

²² Ng'ulu lu isulwanyikiit Lokapolon eyarete akwap, konye ng'ulu lu ilamit nesi ireng'iaro.

²³ Eyait Lokapolon oni koroto kalo itemokina oni alosite kosodi idari ng'ulu lu italakarito nesi.

²⁴ Kibirorosi kesi, mam kesi kideunosi kokwap, naarai itonyouni Lokapolon kesi.

²⁵ Adit eong' sek, amojong' eong' kipokona, konye mam eong' kaanyut Lokapolon inyekiit itung'a lukajokak kere ilipanarosi idwe kes inyamen.

²⁶ Ng'ini pak einanakinete kesi itung'a luce kotoma alakara bobo ikopanakinete, bobo idwe kes erait asulwanyi.

²⁷ Kinyekisi arokusio, kisomata nukajokak, ebuni auri kus akiboi ng'ini pak ka akwap.

²⁸ Naarai emina Lokapolon nu edolito, bobo mam kinyekini itung'a keng' lu emunokina. Idari nesi ikaru kere, konye idwe ka itung'a kalukarokok ireng'iaro.

²⁹ Eyarete lu edolito akwap ka akiboi kaneni ikaru kere.

³⁰ Akiro ka itung'a kalukajokak ejaasi ka acoa, bobo akitukes kes inerasi nu edolito.

³¹ Ipiakito kesi ekisil ka Akuju toma otawon kes bobo mam kesi kinyekinete.

³² Itung'a lukarokok iteete itung'a lukajokak kosodete atamakin akiyara kesi;

³³ konye mam Lokapolon kebuni akinyekin kesi ka akanin ka ipading'atin kes kere de akinyekin kesi etubokino kapak naka ekesi kes.

³⁴ Kipiak amuno kon akainin ka Lokapolon bobo koyong' ikisila keng'; ebuni nesi akiyong' ijo kokipone kaloka ainakin ijo akwap kosodi ijo anyun itung'a lukarokok ireng'iaro.

³⁵ Apak ape ajeni eong' itwan nikaronon ni etosomae aturub noi; auja nesi akilanya ng'ini itwan bala esida loko Lebanon;

³⁶ konye kokau katubor eong' kaneni, bobo mam nesi ajii; abu eong' kakoo nesi konye mam eong' adumun nesi.

³⁷ Kwanyu itung'a lukajokak, kitee kojokan itung'a lu edolito; ejaasi itung'a eminasi aipuc ka auri kes,

³⁸ konye luka arokusio emudiaro cut, bobo emwataro cut auri kes.

³⁹ Eyuuni Lokapolon itung'a lu edolito ka akidar kesi kapakio kanuka ican.

⁴⁰ Ing'arakit nesi kesi ka akitukuu kesi; eyuuni nesi kesi kamaka lukarokok, naarai elosete kesi nama keng' kanuka akidar kesi.