Isabulin 36 - AKITUTUKET NAKITETET (NEPEPEKA ISABULIN KA AWARAGASIA)

Aronus ka etung'anan

Nama kalo epolokiit ekiruke. Ekiruke ka Daudi, lokejaanakinan ka Lokapolon.

¹ Inerasi aronus ka nikaronon kotoma otau keng'; mam nesi keyong't Akuju bobo mam kesi keyong'it nesi.

² Kanu itunanata kesi kojokan kuju kes ka ikulopek, iituto kesi ebe mam Akuju kejenuni arokusio kes ka atubokin kesi.

³ Ejori kes erono bobo ileleba aliokonu; mam bobo kesi kinerasi akiro nuka acoa kanu ejooka.

⁴ Itemetemete kesi nukarokok eperete kesi kapetat; emam ibore ipede ni isomaete kesi ni ejokuna, bobo mam kesi keng'erete ibore ipede nikaronon.

Ajokus ka Akuju

⁵ Lokapolon, amina kon na emam esial edoli kuju; amuno kon edoli odouon.

⁶ Ikiara adolite kon bala imoru; adolite kon eputosi ka akiduloro ka akare. Itung'a nepepe ka ityeng' ejaasi akidario kon.

⁷ Okwai Akuju, ikoni amina kon na emam esial ejokuna ai! Kidumunete siong' akidario kokwap ketoribe ka abenokoka kon.

⁸ Kinuminumete siong' inyamen lu ikorak ijo siong' ipuwaka; Kinyek siong' kamatata alomun kang'ololo kon kana ileleba ajokun.

⁹ Ijo nesi nama elomuna akijar kere, bobo kanuka acaus kon aanyunete siong' acaus.

¹⁰ Kitolosite amina ng'ulu lu ejenete ijo bobo akisomakiite nukajokak ng'ulu lu edolito.

¹¹ Mam akinyekin itung'a luka epogi alomikin eong' kere de lukarokok ainakin eong' akeri.

¹² Kong'oleki nama ebirokinosi itung'a lukarokok. Eng'ulu eperete, mam kebeikinete anyoun.