Isabulin 35 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote aking'arasit

Ekiruke ka Daudi.

¹ Kitepege Okwai Lokapolon ng'ulu lu ketepegete eong', kitijii ng'ulu luketijiyete eong'.

² Kirum ebuku kon ka akwara kon kogwo koyuu eong'.

³ Kolemu akwara kon nepepe ka ayep kon kitijii ng'ulu lu karukitetere eong'. Kisumunik eong' ebe ibuni ijo ayuuni eong'.

⁴ Kitisilikine ng'ulu lu ekotosi akiyara eong'! Kireng'iare bobo kosiliki ng'ulu lu itemetemete akiyara eong'!

⁵ Korautu kesi bala inya lu ekutari ekuwam, kwape erukiter kesi emalaikat ka Lokapolon!

⁶ Kinyek kiryono eroto kes bobo kojurut korukitere kesi emalaikat ka Lokapolon!

⁷ Naarai abutu kesi kolokata eong' emam atenikina de; abutu kesi kobokata adwi kebirokin eong' toma.

⁸ Konye kodumakinosi kesi ka atwanare emam kesi kejenete; konye kikamu kesi aloketait nakigwaito kesi, kibirokinosi kesi ikulopek toma kotwakata!

⁹ Abuni eong' alakari kanuka Lokapolon; abuni eong' alakari naarai abu nesi koyuu eong'.

¹⁰ Ketau kang' kere abuni eong' alimokin Lokapolon, “Emam itwan eputosi ka ijo. Idari ijo lu emam kejaasi ka agogong' kamaka lu ejaasi ka agogong', idari ijo lukapalapalak kama kalukesicanak.”

¹¹ Inerasi itung'a lukesomak arokusio kuju kang' ka akiwosa eong' ikamuut arokusio nu emam eong' kajeni kuju kes.

¹² Etacete kesi nukajokak nu esoma eong' karokusio, kapasa eong' noi.

¹³ Konye na adekatatar kesi, abu eong' kanapa inapen luka akimony lu itenite kicwei; abu eong' kesicana akwana kang' elipi eong' emam akinyama. Abu eong' kelip etulurit eong' akou kang' kwap,

¹⁴ bala kamonyi eong' kanuka ipoupa kang' kere de onac kang'; Abu eong' kajaikin bala itwan ni epodonokin kanuka toto keng', ka alurite kwap amonyi.

¹⁵ Konye na ajaikiner eong' ocani, abutu kesi kere kolakarosi kosodete kesi atukonokin akwenare eong'; abutu ilong'au kipotata eong' ka akitolosite akipot eong'.

¹⁶ Abutu kesi kitooto eong' ekadakiito bala ng'ulu lu ekwenatatare eng'walas.

¹⁷ Ka apak kana etia ai, Okwai Lokapolon itee ijo eong'? Koyuu eong' kalominikin kes eong'; koyuu akijar kang' kong'atunyo kalu!

¹⁸ Kasodi eong' akiyalamikin ijo ka atuket ka itung'a kalu ipuu noi; abuni eong' akiturite ijo koking'aren kes kere.

¹⁹ Mam akinyekin ipading'atin kang', iliokoikis ng'ulu elakarosi kanuka akilanyo kang'. Mam akinyekin ng'ulu lu eding'asi ka eong' emam atenikina elakarosi kanuka icani kang'.

²⁰ Mam kesi kinerasi kokipone kaloka amina; konye ejeete kesi aliokonu naka ng'olo ekipone ikamuut itung'a lu eminasi aipuc.

²¹ Iwosaete kesi eong', ecelasi, “Abutu siong' kaanyutu nu ibu ijo kisoma!”

²² Konye ijo, Okwai Lokapolon iyanyu ijo nu. Kanuka ng'un, mam ataus ti Lokapolon; mam alwanus!

²³ Konyou ijo elope, Okwai Lokapolon kigang'a eong'; konyou, Akuju kang' kogwoik eong'.

²⁴ Idolit ijo, Okwai Lokapolon, kanuka ng'un kimaraki eong' bala itwan ni emam aronus; mam akinyekin ipading'atin kang' elakarosi kanuka akibiror kang'.

²⁵ Mam akinyekin ineranakinosi ikulopek, “Idautu oni kesi! Ng'un bon kes nu akotosi oni!”

²⁶ Elipit eong' kilanyai cut bobo kigurokina ng'ulu lu elakara kanu ecanare eong'; Elipit eong' kosilik bobo kodumakinosi ka arokusio ng'ulu lu ipogasi ebe ejooka kesi adepar eong'.

²⁷ Kinyeki ng'ulu kere lu ekotosi kolakakine eong' kikareoto ka ailel bobo kolakarosi bobo kotemasi ng'ini pak, “Ikoni Lokapolon epolo ai! Elakara nesi itolosito lukejaanakinak keng' kojokan!”

²⁸ Kanuka ng'un ebuni akituk kang' ejori ng'ini pak kuju ka adolite kon, kasodi eong' akiturite ijo ng'ini pak.