Isabulin 34 - AKITUTUKET NAKITETET (NEPEPEKA ISABULIN KA AWARAGASIA)

Akitur ajokus ka Akuju

Ekiruke ka Daudi, na emolekiner nesi ajaus ka ibiler koking'aren ka Abimelek, tetere ejakait ireng'iari nesi king'a, kosodi nesi aikar.

¹ Abuni eong' akiyalamikiite Lokapolon ng'ini pak; mam cut eong' kenyekini akiturite nesi.

² Abuni eong' akiturite nesi kanuka nu esoma nesi; kiirasi ng'ulu kere lu isicanio, bobo kolakarosi!

³ Kolimonorete nepepe ka eong' kuju ka apolou ka Lokapolon; keturoto ekiror keng' nenipe!

⁴ Abu eong' kelipi Lokapolon, kobong'okini nesi eong'; abu nesi kolaku eong' kakurianu kang' kere.

⁵ Iteete lu isicanio nesi kosodete alakari; mam cut kitakadikino kesi itawon.

⁶ Iworounete nesi ng'ulu lu emam kejaasi kani ing'arakini kesi, kobong'okini nesi; iyuuni nesi kesi kocani kes kere.

⁷ Idari emalaikat ka Lokapolon ng'ulu lu eyong'ito nesi, ka ayuuni kesi kakang'as.

⁸ Kotamaki ijo ilope kojenu kwape ejokunar Lokapolon. Erereng' ng'ulu lu eng'opito kama keng'.

⁹ Koyong'ata Lokapolon, osi itung'a keng' kere; ng'ulu lu eyong'ito nesi ejaasi kang'in ibore kani ekotosi kesi.

¹⁰ Atikere ing'atunyo de iiranarete eteng'e kanuka amamus ka inyamen, konye ng'ulu lu eyong'ito Lokapolon, emam ibore ipede ni emam kesi kedumunete.

¹¹ Kobuutu Okwai isapa kang', abuni eong' akisisianakn osi ayong'ite Lokapolon.

¹² Ng'ai itwan emina akijar? Bobo ng'ai emina akijar kokaru kalu ipu tetere edumuni nesi nukajokak?

¹³ Kirebok ang'ajep ejori nukarokok bobo kirebok akituk kon ejori aliokonu.

¹⁴ Kinyeki arokusio, kisoma nukajokak; kokoo aipuc, bobo kigwap aipuc.

¹⁵ Iteete akonyen ka Lokapolon ng'ulu lu edolito ka akipup akimonyo kes;

¹⁶ konye eng'erit nesi ng'ulu lu isomaete arokusio, tetere imuruoro kesi atipet na etwakata kesi.

¹⁷ Iworitosi lu edolito aking'arasit, iirari Lokapolon kesi; eyuuni nesi kesi kocani kes kere.

¹⁸ Apie Lokapolon kamaka ng'ulu kalu emojakina itawon kes; bobo iyuuni nesi ng'ulu lu adaun amuno kes.

¹⁹ Ejaasi itwan nikajokan ka ican kalu ipu noi; konye iyuuni Lokapolon nesi kocani kang'ulu kere.

²⁰ Idari nesi akojoo keng' kere; emam apede ebilio.

²¹ Ebunete arokusio akiyara itung'a lu isomaete nukarokok; ng'ulu lu ereito itung'a lu edolito ebunio akisican kesi.

²² Eyuuni Lokapolon lukejaanakinak keng'; emam ipede kamaka ng'ulu kalu eng'opito kama keng' ebunio akisican.