Isabulin 33 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akitur

¹ Osi kere lu idolito, kikareikisi kiporotoi kaluka ailel kanu esoma Lokapolon; kiturwoto nesi osi kere lu iyong'ito nesi.

² Kiyalamikisi Lokapolon kaulerun, kirukokisi nesi kiboro kaluka aunoi.

³ Kirukokisi nesi ekiruke lokitetet, kokutata auleru kojokan, bobo kikareikisi kotoma ailel!

⁴ Akiro ka Lokapolon eraito abeite bobo asomisio keng' kere ebeikino amunokin.

⁵ Emina Lokapolon ibore ni ideere kani edolit; amina keng' na emam esial ileleba akwap.

⁶ Asubuni Lokapolon kuju ka akirot keng', asubuni nesi akolong', elapa ka akanyer kakirot kana alimuni nesi.

⁷ Abu nesi kotukoki akipi nuka akare kere alaro ape; abu nesi kogoloki akonyen ka akare kodula.

⁸ Kinyek kimaa akwap kere Lokapolon! Kinyek koyong'ata itung'a kere luka akwap nesi!

⁹ Na alimuna nesi, kosubuni akwap; kotakanuuni ng'in ibore akitoro akicorasit keng'.

¹⁰ Itamamuunene Lokapolon akitemitemisio nuka akwapin; irebonokini nesi kesi asoma nu itemitemito kesi.

¹¹ Konye akitemitemisio keng' ejaasi ikaru kere; akitemitemesio keng' ideunosi ikaru kere.

¹² Erereng' akwap na erait Akuju Lokapolon kes; erereng' itung'a lu aseu nesi araun lu keng'!

¹³ Itee Lokapolon kwap alomun kokuju ka akitere oni etung'anane kere.

¹⁴ Alomun kama ipugaa nesi, itee nesi kwap ng'ulu kere lu iboete kokwap.

¹⁵ Iteni nesi awomowomisio kes kere, bobo ejeni ng'ini ibore ni isomaete kesi.

¹⁶ Mam ejakait kilanyi kanuka ajore keng' kana ejaasi ka apedor; mam loka ajore kilanyi kanuka agogong' keng'.

¹⁷ Mam afarasit naka ejie keyauni apedor naka akilanya; agogong' keng' na epolo mam kebeikini ayuuni.

¹⁸ Kitee, iteete akonyen ka Lokapolon ng'ulu lu eyong'ito nesi, ng'ulu lu emunokiito amina keng' na emam esial,

¹⁹ tetere eyuuni nesi kesi katwanare; ka akidar kesi ejarete ka apak kanaka akamu.

²⁰ Ipiakiito siong' akiyuun kosi namaka Lokapolon; nesi nes ebuku kosi bobo aking'arasit kosi.

²¹ Ilakara siong' kanu keng'; imunokiito siong' ekiror keng' lokalaunan.

²² Kinyek kojii amina kon na emam esial ka siong', Lokapolon, ipiakiito siong' amuno kosi nama kon.