Isabulin 32 - AKITUTUKET NAKITETET (NEPEPEKA ISABULIN KA AWARAGASIA)

Akisilar nepepe ka Arimakino

Ekiruke ka Daudi. Amaskil.

¹ Erereng' ng'ini nikerimakin arokusio keng', ng'ini nikerapakin arokusio keng'.

² Erereng' ng'in ni emam Lokapolon kiwosae kanuka asoma nukarokok bobo ng'ini ni emam kejaasi ka aliokonu.

³ Ering'a eong' kesilara arokusio kang', abu kapas eong', kanuka akimonyo apaaran kere.

⁴ Paran ka akwaare ibu ijo kitisila eong' Lokapolon; abu agogong' kang' kodaun cut, kwape itowonia amwanus naka akamu akiinaute.

⁵ Abu eong' kacamu arokusio kang' koking'aren kon; amam eong' abu kegwa arokusio kang'. Abu eong' katema, “Esilari eong' arokusio kang' koking'aren ka Lokapolon”, kosodi ijo arimakini arokusio kang'.

⁶ Kanuka ng'un kinyek ng'in itwan nikiyong'it ijo kilip ijo; kapakio kanuka icani, kapakio icani, nu etikunototor akipi ipu, mam kedolokinete nesi.

⁷ Irait ijo nama ang'opitere eong'; iyuuni ijo eong' kocani. Iinak ijo eong' alakara kanuka alakuno.

⁸ Ebala Lokapolon ebe, “Abuni eong' akisisianakin osi eroto lo itemokina osi alosite; abuni eong' akitodikin osi ka akicor osi.

⁹ Mam araus bala afarasit kere de enyubu na ewolit, na ekote ng'ini pak koyaitete nesi kegilut, kemam mam kigwapi ijo.”

¹⁰ Ebunete lukarokok akicanakin, konye ng'ulu lu emunokiito Lokapolon idari kesi amina keng' na emam esial.

¹¹ Kolakara kamaka Lokapolon, bobo kojaasi ka ailel, Okwai osi lu idolito, kocelasi ka alakara, osi kere lu idolito ko otawon!