Isabulin 31 - AKITUTUKET NAKITETET (NEPEPEKA ISABULIN KA AWARAGASIA)

Akilip naka amunokiite Akuju

Nama kalo eplolokiit ekiruke. Ekiruke ka Daudi.

¹ Abuni eong' nama kon, Lokapolon akidario; mam akinyekin ilanyo eong'. Irait ijo Akuju na edolit; koyuune eong', elipit eong'!

² Kiirare eong'! Koyuune eong' kipokona! Korau nama akeri eong' aking'op kanuka akidar eong'; ebuku kang' lokayuuni eong'.

³ Irait ijo ataaba kang' ka ebuku kang'; kanuka ekiror kon koyaite eong' bobo kitoodik eong' eroto,

⁴ Kidara eong' kaloketa kanu elokitere eong' naarai ijo nes ebuku kang'.

⁵ Akanin kon nes egwaaki eong' emoyo kang'. Iyuu ijo eong' Okwai Lokapolon, Akuju lo emunokina.

⁶ Ireit ijo ng'ulu lu eyong'ito aputon, konye eong' amuno kit Lokapolon.

⁷ Abuni eong' ajaus ka ailel ka alakara kanuka amina kon na emam esial. Iira ijo ican kang',

⁸ bobo mam ijo akigwaakin eong' akanin ka ipading'a kang', icamaki ijo eong' kaloto nama akote eong'.

⁹ Kisoni eong', Okwai Lokapolon, naarai ajii eong' ocan, apasata akonyen kang' akimonyo; apasa emoyo kang' ka akwana de.

¹⁰ Kapasa eong' akituur, bobo etuurian akimony akijar kang'. Ketapasata eong' icani kang' kere; atikere akojo kang' de amamuutu agogong'.

¹¹ Ipading'atin kang' kere kacut ipadukotin kang', kanwang'ito eong'; ng'ulu lu ejenete eong' ekurianito eong'; na anyunata eong' koroto, emotarosi.

¹² Ng'ini itwan emuruoki eong' bala katwana eong'; aputosi eong' ka ibore kani acakar.

¹³ Apupi eong' ipading'atin lu ipu iweiwaasi; imanakiit eong' akurianu. Itemetemete kesi irotin luka akiyara eong'.

¹⁴ Konye amunokiit eong' ijo, Okwai Lokapolon; abala eong', “Irait ijo Akuju kang'.”

¹⁵ Ejii akijar kang' akanin kon; koyuune eong' ka akanin ka ipading'atin kang', ka ng'ulu kalu kesicanete eong'.

¹⁶ Kitee lokejaanakinan kon ka asianut; koyuune eong' ka amina kon na emam esial.

¹⁷ Mam akinyekin eong' ketisilikino, Okwai Lokapolon, naarai eworoe eong' ijo, Kinyek kitisilikine luka arokusio, kinyek kesi koikasi etiiti nama ka lukatwak.

¹⁸ Kinyek akituke nukeng'alak kikarikisi ejori, nu inerasi kepogi itepegete lu edolito, lu inerasi kepogi ka anwang'ite.

¹⁹ Okwai ikoni ajokun kon epolo ai, ajokun na itoodiki ijo ng'ulu lu eyong'ito ijo, bobo ng'ini na iinu ijo ng'ulu lu ekuriakito ijo, koking'aren ka isapa ka ikiliok.

²⁰ Itong'opi ijo kesi kotolim kon, itong'opi ijo kesi kaloketa ka itung'a; itogopit ijo kesi kotolim kon, karaton ka ang'ajepa.

²¹ Kiturwoi Lokapolon! Naarai etodiki nesi eong' amina keng' kokipone kaloka aumokin na erimokitere eong' ka alomikin!

²² Kakitim kang' abu eong' katema, “Kereng'iar eong' koking'aren kon”. Konye ibu ijo kiira akimonyo kang' apak na amonyakina eong' ijo king'araki eong'.

²³ Kominasi Lokapolon, osi kere itung'a keng'! Idari Lokapolon lu emunokina, konye itisilaari luka epogi.

²⁴ Kicasitete, mam akurianu, osi kere lu imunokiito Lokapolon.