Isabulin 30 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akiyalama

Ekiruke ka Daudi. Ekiruke apak naka akisilwanyikin Etogo ka Akuju.

¹ Eturi eong' ijo Lokapolon naarai iyuu ijo eong' bobo ireboki ijo ipading'atin kang' akilanya eong'.

² Abu eong' kamonyaki ijo king'araki eong', Okwai Lokapolon Akuju kang', kitang'aleuni ijo eong';

³ ibu ijo koyuu eong' kamaka lukatwak. Alosiyorit eong' cut nama ka lukatwak, konye ibu ijo koyuu eong'.

⁴ Kiturwoto Lokapolon, itung'a keng' kere lu emunokina! Kiitutu nu esoma Lokalaunan, ka akiyalamikin nesi.

⁵ Anyunyura keng' erait usa naka apak kana ewuriyana, ajokus keng' erait naka apakio kere. Ebeikinete akiyo alele kware, konye ebuni ailel taparacu.

⁶ Konye eong' abu katema kojautene kang' kaloka abara, “Mam cut kilanyo eong'.”

⁷ Ijokuna ijo kama kang' Lokapolon; idarit ijo eong' bala emoru lo epolo noi. Konye apak ng'ini ibu ijo kong'opik eong', kasodi eong' akurianaar.

⁸ Abu eong' kanyarau ijo Lokapolon; abu eong' kemaima ijo king'araki eong':

⁹ “Inyena idumuni ijo katwanare kang'? Inyena idumuni kaloto eong' ates? Ebeikinete itung'a lu etwakito akiturite ijo? Ebeikinete kesi de akisiarasiara kuju ka ajokus kon kanaka ng'ini pak?

¹⁰ Kiirare eong' Lokapolon, bobo kisoni eong'! King'arakine eong' Okwai Lokapolon!”

¹¹ Ibeloki ijo akimonyo kang' ka akitaraun akileje naka ailel; ilema ijo akimonyo kang' ka akirimokin eong' ka ailel.

¹² Kanuka ng'un, mam eong' katauni ti; abuni eong' akiturite Akuju. Lokapolon, irait ijo Akuju kang', abuni eong' akiyalamikiite ijo ikaru kere.