Isabulin 29 - AKITUTUKET NAKITETET (NEPEPEKA ISABULIN KA AWARAGASIA)

Eporoto ka Lokapolon kotoma okuwam

Ekiruke ka Daudi.

¹ Kiturwoto Lokapolon osi isuban luko kuju; kiturwoto akibusesu ka apedor keng'.

² Kiturwoto ekiror ka Lokapolon lo ejaasi ka akibusesu; kokukokinosi koking'aren ka Lokapolon na etakanuuna nesi.

³ Epupo eporoto ka Lokapolon alomun ka akaren; ireta Akuju lo ejaasi ka akibusesu, bobo epupo eporoto keng' kokuju ka akare.

⁴ Epupo eporoto ka Lokapolon ka agogong' keng' kere ka apedor kere.

⁵ Eporoto ka Lokapolon ebilibili ikito luka esida, atikere isidai luko Lebanon.

⁶ Einanikini nesi imoru luko Lebanon eporitosi bala itaka, bobo einanikini nesi emoru loko Arimon aporonor kuju bala emong' loci.

⁷ Einakiit eporoto ka Lokapolon idowon akimiliaunun.

⁸ Einakiit eporoto keng' moding' akijang'ajang'a; ijang'ijang'i nesi moding' loko Kades.

⁹ Ijang'ijang'i eporoto ka Lokapolon ilwaai, ka araranar akwii kokito ecela ng'ini itwan ko Otogo keng' ebala, “Akibusesu kojaasi ka Akuju!”

¹⁰ Ipugae Lokapolon kokuju ka akipi kanu ipu noi; ipugae nesi bala ejakait ikaru kere.

¹¹ Isicasi Lokapolon itung'a keng' ka akisulwanyikin kesi ka ainapakina.