Isabulin 26 - AKITUTUKET NAKITETET (NEPEPEKA ISABULIN KA AWARAGASIA)

Akilip naka itwan kani ejokuna

¹ Kigang' eong', Okwai Lokapolon, naarai emam eong' aronus, bobo amunoki eong' Lokapolon komam akijang'ajang'a.

² Komoo bobo kong'ici eong', Lokapolon; kotuboki ejautene kanu akote eong' kanu eitunene eong'.

³ Amina kon na emam esial nes kayait eong'; kayait eong' amunokina kon ng'ini pak.

⁴ Mam eong' kaupasi ka itung'a lu emam kejaasi ka adumunet apede; emam ibore ipede amorete eong' ka itung'a luka esoswai.

⁵ Kakadakiit eong' aupa ka itung'a luka arokusio bobo ang'erit eong' itung'a luka arokusio.

⁶ Lokapolon, eloto eong' akanin kang' akitodikin ebe emam eong' aronus bobo alosi eong' emae ijo emanimani altari kon.

⁷ Eruko eong' ekosio loka akiyalama ka ejori kuju ka akiro kere nukajokak.

⁸ Amina eong' etogo lo iboya ijo, Okwai Lokapolon, nama ejainikin akibusesu kon.

⁹ Mam akiyara eong' nenipe kalukarokok; koyuu eong' ka akanin kalukarokok —

¹⁰ ng'ulu lu isomaete nukarokok; kisoni eong' bobo koyuu eong'!

¹¹ Konye ikamuut eong', esomae eong' nu edolito; kisoni eong' bobo koyuu eong'!

¹² Akuu eong' kakang'as kere; Katukot ka itung'a keng', keturi eong' ijo Lokapolon.