Isabulin 23 - AKITUTUKET NAKITETET (NEPEPEKA ISABULIN KA AWARAGASIA)

Lokapolon, Lokejokon wok

Ekiruke ka Daudi

¹ Lokapolon nesi lokejokon kang', ajaasi eong' kang'in ibore ni akote eong'.

² Isieong'uni nesi eong' konya kalu elibito bobo eyait nesi eong' nama ejaasi akipi nu ejooka.

³ Einanakini nesi eong' agogong'u nakitetet. Kayait nesi eong' korotin kalu edolito, kwape etumunikina nesi.

⁴ Atikere ketoro eong' ajesat na iriono naka atwanare, mam eong' kakurianaar aronus, naarai ijaasi ijo ka eong'. Ebela kon ka aparik kon kedarito eong'.

⁵ Itenaki ijo eong' epucit kama iteoto ipading'atin kang'; inyonyoik ijo eong' akinyet akou kang', bobo ilelebe ijo ekikopot kang' imatan kobukonorosi.

⁶ Abeite, ebuni ajokun nepepe ka asianut atupite eong' ka akijar kang' kere; abuni eong' akiboi ko otogo kon ikaru kere.