Isabulin 22 - AKITUTUKET NAKITETET (NEPEPEKA ISABULIN KA AWARAGASIA)

Akimony naka apipilu nepepe ka ekiruke loka Akitur

Nama kalo epolokiit ekiruke: Atupa ka Indi lo iwali akwap. Ekiruke ka Daudi.

¹ Akuju kang', Akuju kang' inyo inyekina ijo eong'? Amonyo eong' noi king'arakine eong', konye ering'a aking'arasit kedumuna.

² Paran keworoe eong' ijo, Akuju kang', konye mam ijo kibong'okini; Anyara eong' kware konye emam eong' aipuc.

³ Konye ikiarite ijo bala Lokalaunan, lo iturit akwap nako Israel.

⁴ Abutu luka asonya kosi komunokisi ijo; abutu komunokisi ijo kosodi ijo ayuuni kesi.

⁵ Abutu kesi kiworoto ijo kokuyete kesi kakang'as; abutu kesi komunokisi ijo, mam kesi asilikin.

⁶ Konye mam eong' bobo karait itwan; arait eong' ekurut, kanwang'ite eong' ka akwenare ng'ini itwan!

⁷ Ng'ulu kere lukaanyunete eong' kejutanarete eong' inerasi ekwenatatare eong', ka akimung'umung'u akwes kes.

⁸ Ebalasi, “Ibu ijo komunoki Lokapolon. Inyo emamare nesi kiyuuna ijo? Kemina Lokapolon ijo, inyo emamare nesi king'arakina ijo?”

⁹ Ijo nes kilemuni eong' kakooki ka toto kang', bobo na araitere eong' ikoku, ibu ijo kidara eong'.

¹⁰ Ajaikin eong' amunokiit ijo ape kedounere eong'. Ijaikin ijo irait Akuju kang' ape kidounere eong'.

¹¹ Mam alwanari kama kang'! Apiete icani, bobo emam itwan ing'arakini eong'.

¹² Irimokito eong' ipading'atin ipu bala imong'in; imanakito kesi kere eong' bala imong'in lukadedeng'ak luko Basan.

¹³ Eng'arito akituke kes bala ing'atunyo, egirosi nama kang', bobo elokokina anyilinyil eong'.

¹⁴ Aika agogong' kang', aika bala akipi nu abukokinosi kwap. Alomasi akojo kang' kere kama erucokinore; erait etau kang' bala emidol ka awo lo kecalar.

¹⁵ Ewonit eporoto kang' bala apua, bobo ang'ajep kang' ikamakina kuju ka akituk kang'. Inyeki ijo eong' eridi ka apua.

¹⁶ Imanakito eong' atuket kaluka arokusio; irimokito eong' bala akatong'otong'ot naka ing'okwo; edaadaete eong' akanin ka akejen.

¹⁷ Edeun eong' arait akojo usa; keteete eong' ipading'atin kang' edupakiito akonyen kes nama kang'.

¹⁸ Iposiete kesi ekura kanuka inapen kang' ka akoranar kesi inapen kang'.

¹⁹ Okwai Lokapolon mam alwanus kama kang'! Kobuu atipet koyuu eong'!

²⁰ Koyuu eong' kokileng' kalo euja; koyuu eong' kamaka ing'okwo kalu.

²¹ Koyuu eong' kamaka ing'atunyo kalu; ajii eong' emam apedor koking'aren ka imong'in kalu kalukokitwi.

²² Abuni eong' alimokin itung'a kang' nu isoma ijo; abuni eong' akiturite ijo katukon kes:

²³ “Kiturwoto nesi, Okwai osi lukejaanakinak ka Lokapolon! Koyong'ata nesi osi auri ka Yakobo! Kimaata nesi, osi itung'a luko Israel!

²⁴ Mam nesi keng'erit lukapalapalak kere de kecakarit lu ejaasi ka ican; mam nesi keng'opikiit kesi, konye epupi nesi kesi na ilipiata kesi aking'arasit.”

²⁵ Koking'aren katukot keturi eong' ijo kanu isoma ijo; koking'aren kang'ulu kalu imaete ijo alemuni eong' isuban lu etumunikiit eong'.

²⁶ Ebunete lukapalapalak akinyama kwape ekototore; ng'ulu lu ebunete nama ka Lokapolon ebunete akiturite nesi. Kisomata kesi kojokan ikaru kere!

²⁷ Ebunete akwapin kere akiitun Lokapolon. Alomun kang'in alaro ka akwap, ebunete itung'a abong'okin nesi; ebunete itung'a luka itekerin kere akimaa nesi.

²⁸ Erait Lokapolon ejakait, bobo ipugae nesi akwapin.

²⁹ Ebunete itung'a kere luka epogi aluruokin nesi; ebunete itung'a kere akilur koking'aren keng'.

³⁰ Ebuni auri naka apaarasia kanu ebuuto akijaanakin nesi; ebunete kesi alimonokin auri na ebuut kuju ka Lokapolon.

³¹ Elimokino itung'a lu ering'a kidouna: “Abu Lokapolon kiyuu itung'a keng'.”