Isabulin 21 - AKITUTUKET NAKITETET (NEPEPEKA ISABULIN KA AWARAGASIA)

Akitur kanuka akilanya

Nama kalo epolokiit ekiruke. Ekiruke ka Daudi.

¹ Okwai Lokapolon, elakara ejakait kanu iinakina ijo nesi agogong'; elakara nesi naarai ibu ijo koinaki nesi apedor naka akilanya.

² Iinaki ijo nesi nu akote etau keng'; iinaki ijo nesi nu elipit nesi.

³ Ibu ijo nama keng' ka asulwany na epolo ka akigwakin abokoki naka esawabu akou keng'.

⁴ Kilip nesi akijar, koinakini ijo, akijar naka aujan bobo emam esial.

⁵ Epolo akibusesu keng' kanuka aking'arasit kon; iinak ijo nesi ajenun nepepe ka ang'osibib.

⁶ Ejaasi nesi ka asulwanyi kon ikaru kere bobo ajaus kon italakarit nesi.

⁷ Igwakiit ejakait amuno keng' nama ka Lokapolon Akuju; bobo kanuka amina na mam kedaun naka Lokapolon, emam akang'as edumakinosi ka nesi apak apede.

⁸ Ebuni akani kon, Okwai ejakait akikamun ipading'atin kon kere; ebuni akani kon nakoteten akikamun ng'ulu lu eng'erito ijo.

⁹ Na itakanuna ijo ibuni ijo amudiar kesi bala ka akimi kana enoki noi. Ebuni Lokapolon amudiar kesi ka anyunyura keng', ebuni akimi akitisisi kesi cut.

¹⁰ Emam ipede kamaka auri kes ni ebuni akikuu; ebuni ejakait akiyara kesi kere.

¹¹ Itemetemete kesi akiro kes ka akilok ekipone loka adaun nesi, konye emam cut ibore ipede isomakin.

¹² Naarai ibuni ijo akireng'iar kesi kokerata, ibuni ijo adaada kesi ireeta itosomae imalia kon.

¹³ Kiturete siong' ijo Lokapolon kanuka agogong' kon kana epolo noi! Ibunete siong' ekiruke ka akiturite apedor kon.