Isabulin 19 - AKITUTUKET NAKITETET (NEPEPEKA ISABULIN KA AWARAGASIA)

Akibusesu ka Akuju koboro kalu asubi nesi

Nama kalo epolokiit ekiruke. Ekiruke ka Daudi.

¹ Ikoni kuju itodiarit akibusesu ka Akuju ai! Ikoni itodiarit kojokan nu esoma nesi ai!

² Elimonokini ng'ini paaran akibusesu keng' apaaran na etupakini; ng'ini akwaare ebong'okini alimokin akibusesu keng' akwaare na etupakini.

³ Emam ejori kere akiro nu itosomao, emam eporoto lo epupo;

⁴ konye akiro kesi isiarakinos akwap kere bobo iiraro kosial ka akwap. Kodukok Akuju akolong' ere kokuju;

⁵ elomuni king'a taparacu bala eteran, bala ekakeran lo ekote akerite.

⁶ Egeuni kosial ka epe kaloko kuju kosodi aikar atubor osial loce. Emam ibore ipede ni ebeikini ang'opikin amwanus keng'.

Ekisil ka Lokapolon

⁷ Ideere ekisil ka Lokapolon; einakini agogong'u nakitetet. Acorasia ka Lokapolon emunokina, einakito acoa lu emamatatar.

⁸ Edolito ikisila ka Lokapolon; bobo elakara ng'ulu lu eyong'ito. Edolito acorasia ka Lokapolon bobo einanikinete adama akijen.

⁹ Ayong'ite Lokapolon ejokuna; bobo ebuni akitolot ikaru kere. Edolit atubonokin ka Lokapolon; ejokuna ng'ini pak.

¹⁰ Ekotoi kesi noi akilanya esawabu lo elae; ejijimi kesi noi akilanya esik na eliyaara noi.

¹¹ Kainakiito kesi eong' ekejaanakinan kon acoa; karopite eong' kanuka ayong'ite kesi.

¹² Emam ipede kama wok ebeikini anyun adiakareta wok ka ikulopek; koyuune eong' Lokapolon kamaka adiakanareta nu eng'opito!

¹³ Kidara eong' kamaka arokusio nu ebeikino akote asima, mam ajalakin kesi kilanyata eong'. Kasodi eong' araun ni edolit bobo ni elakakina ka arokusio.

¹⁴ Korautu akiro kang' ka awomowomosia kang' nu ecamakina kama kon, Okwai Lokapolon, ekadaran eong' ka lokeyuunan eong'!