Isabulin 18 - AKITUTUKET NAKITETET (NEPEPEKA ISABULIN KA AWARAGASIA)

Ekiruke ka Daudi loka akilanya

Nama kalo epolokiit ekiruke. Ekiruke ka Daudi ekejaanakinan ka Lokapolon, lo kelimokini Lokapolon akiro ka ekiruke kalo apaaran na eyuuna Lokapolon nesi kakan ka ipading'atin keng' kere, bobo kakan ka Saulo. Kotemari nesi:

¹ Amina eong' ijo Lokapolon! Ijo nes agogong' kang'.

² Lokapolon nes lokedaran kang'; nesi nes erait ebuku kang'. Akuju kang' nes erait lokedaran kang', bobo ajaasi eong' ka nesi akuit eong'. Idari nesi eong' bala ebuku; kigang'i nesi eong' ka akidara eong' kojokan.

³ Anyarauni eong' Lokapolon, kosodi nesi ayuuni eong' kamaka ipading'atin kang'. Keturuoto Lokapolon!

⁴ Kayenito eong' aunoi nuka atwanare; abutu ikokoron luka atwanare kitoroto kuju kang'.

⁵ Kayenit eong' atwanare, kosodi ates akilok eong'.

⁶ Kocani kang' anyarauni eong' Lokapolon; abu eong' kanyarau Akuju kang' aking'arakin eong'. Ejii nesi otogo keng', abu nesi kiira eporoto kang'; kiirari nesi akimonyo kang' naka akote aking'arasit.

⁷ Kosodi akwap akicekun ka akijang'akin; kosodete apeteta ka imoru akijang'ajang'a, abu Akuju konyunyurar.

⁸ Kobukun apuru kokumes keng', kolomuni kakituk keng' atotol ka akimi nu enokete.

⁹ Kocil nesi kuju kanuka ang'ar, kosodi adokun kwap nepepe ka edou lokerionon kakejen keng'.

¹⁰ Aporotoi nesi atipet kabenokoka keng'; alosi nesi ka abenokoka kekuwam.

¹¹ Emukuworo nesi elope ka akirionus; abutu idowon lukapolok, lu ajaasi ka akipi kimanakisi nesi.

¹² Kolomunete akako nepepe ka akimilia naka akimi kotoma okipie koking'aren keng'; kosodi akitoro odowon lukeriokok.

¹³ Kosodi Lokapolon agirokin kokuju; kosodi eporoto kalo Eliliara noi apupun.

¹⁴ Kogumari nesi ikoijoi keng' kosodi akisiarakin ipading'atin keng'; ka akimilia ka ekipie kitekeri nesi kesi.

¹⁵ Na eretakina ijo ipading'atin kon, Okwai Lokapolon, ka akitukurian kesi ka adedeng'u kon, abuni kong'aare icorin luka akare, apeteta nuka akwap apotu kotakanuutu.

¹⁶ Korwauni Lokapolon akani keng' alomun kokuju kosodi akirum eong'; kiriuni nesi eong' alomun ka akipi kanu ipu noi.

¹⁷ Abu nesi koyuu eong' alomun kamaka ipading'atin kang' luka agogong' noi bobo kama ka ng'ulu kere lu kareito eong', ecasito kesi noi kama kang'.

¹⁸ Kolomokisi kesi eong' ajii eong' ocani, konye abu Lokapolon kidara eong'.

¹⁹ Kolemu nesi eong' ka kang'asi; koyuuni nesi eong' naarai alakara nesi ka eong'.

²⁰ Eropenene Lokapolon eong' naarai esomae eong' nu edolito; isulwanyinikini nesi eong' naarai emam eong' aronus.

²¹ Aricaki eong' ekisil ka Lokapolon; mam eong' kenyekiit Akuju kang'.

²² Aricaki eong' ikisila keng' kere; mam eong' kanwang'it acorasia keng'.

²³ Ejeni nesi ebe emam eong' aronus, ebe edara eong' akwana kang' kamaka asoma arokusio.

²⁴ Kanuka ng'un, eropi nesi eong' naarai esomae eong' nu edolito, naarai ejeni nesi ebe emam eong' aronus.

²⁵ Okwai Lokapolon, imunokina ijo kamaka ng'ulu kalu emunokiito ijo; ijokuna ijo noi kamaka ng'ulu kalu edolito.

²⁶ Ilae ijo kamaka ng'ulu kere kalu elaete, konye idedeng' ijo kamaka ng'ulu kalu eroko.

²⁷ Iyuuni ijo ng'ulu lu iyapeperasi, konye iyapeperauni ijo ng'ulu lu ipogasi.

²⁸ Okwai Lokapolon, ijo iinanikini eong' acaus; ijo ilemari akirionus kang'.

²⁹ Iinanikini ijo eong' agogong' naka alomikin ipading'atin kang' ka agogong' naka akilanya kesi.

³⁰ Akuju lo ikote asomisio keng' edolito ai! Ikote akiro keng' emunokina ai! Eputosi nesi ka ebuku kamaka ng'ulu kere kalu ekotosi akidaro keng'.

³¹ Lokapolon bon nes erait Akuju; Akuju bon nes ebuku wok.

³² Nesi nes Akuju lo inakiit eong' agogong', lo idari eroto kang'.

³³ Ainaki nesi akejen kang' agogong'u bala nuka amori; idari nesi eong' komoru.

³⁴ Isisianakini nesi eong' ejie, tetere abeikiit eong' akitosoma akabwa na icasit.

³⁵ Okwai Lokapolon, idari ijo eong' ka ayuuni eong'; ainaki akidara kon eong' apolou, kedara eong' agogong' kon.

³⁶ Idara ijo eong' kamaka amudiaro, bobo mam eong' apelem kebiroro.

³⁷ Egwapit eong' ipading'atin kang' ka akikama kesi; mam eong' keyeng'uni akitodolo nama amudiara eong' kesi.

³⁸ Enomi eong' kesi kwap bobo mam kesi kenyounete; eperete kesi idong'orite koking'aren kang'.

³⁹ Iinakini ijo eong' agogong'u naka akilanya kojie ka apedor naka akilanya ipading'atin kang'.

⁴⁰ Iinakini ijo ipading'atin kang' emotarosi kama kang'; amudiari eong' ng'ulu lu kareito eong'.

⁴¹ Emonyete kesi aking'arasit konye emam itwan ipede ni iyuuni kesi; enyaraunete kesi Lokapolon konye mam nesi kebong'okini.

⁴² Epiricaari eong' kesi, tetere kesi eraunete apua nu ekutari ekuwam. Epudae eong' kesi bala adwat korotin.

⁴³ Ibu ijo koyuu eong' kamaka itung'a kalu emam kepupete akiro, kitarauni ijo eong' lokepugan akwapin; arautu itung'a lu sek amam eong' kajeni kesi lukejaanakinak kang'.

⁴⁴ Kaluronokinete eong' ilong'au; kiirasi kesi eong', kayong'ito eong'.

⁴⁵ Abu komamu ilong'au agogong'u; kolomunete kesi kama keng'opitere icekete.

⁴⁶ Ejari Lokapolon! Kiturwoi ebuku kang'! Kiturwoi Akuju lokeyuunan kang'.

⁴⁷ Einakini nesi eong' akilanya ipading'atin kang'; ipiakini nesi akwapin akanin kang'

⁴⁸ ka ayuuni eong' kamaka ipading'atin kang'. Okwai Lokapolon, iinakini ijo eong' akilanya ipading'atin kang' ka akidara eong' kamaka itung'a kalu ededeng'.

⁴⁹ Kanuka ng'un, keturi eong' ijo ka akwapin; erukokiit eong' ijo ikurukesnei luka akiturite.

⁵⁰ Einanikini Akuju ejakait keng' akilanya naka polon; itodikit nesi amina na mam kedaun ng'ini ni aseu nesi, Daudi nepepe ka auri keng' ikaru kere.