Isabulin 16 - AKITUTUKET NAKITETET (NEPEPEKA ISABULIN KA AWARAGASIA)

Akilip naka amunokite

Amiktam ka Daudi

¹ Kidara eong', Okwai Akuju; amunokit eong' ijo ibeikini akidara eong'.

² Alimonokini eong' Lokapolon, “Irait ijo Lokapolon kang'; iboro kere lukajokak lu ejaasi ka eong' elomuto kama kon.”

³ Ikote itung'a ka Lokapolon lu emunokina ejoka cut ai! Nu ketalakarito eong' noi erait ajaus ka kesi.

⁴ Konye ng'ulu lu imaete akujun ace, edumunete icani lu ipu noi. Mam eong' kamoret ka kesi kosuban kes, mam eong' kamai akujun kes.

⁵ Ijo Lokapolon, nes irait iboro kere lu ejaasi ka eong'; bobo kiinanikini ijo eong' iboro kere lu akote eong'; Akijar kang' naka imoi ejii akanin kon.

⁶ Ikote idutan lu kinak ijo eong' itiminarito ai; ikote ejoka ai!

⁷ Eturi eong' Lokapolon naarai nes kayait eong', bobo kware kekwenyari eong' etau kang'.

⁸ Ng'ini pak ajeni eong' ajaus ka Lokapolon; api nesi, bobo emam ibore ipede ijang'akini eong'.

⁹ Kanuka ng'un eyalama eong' bobo alakara eong', bobo apupi eong' ebe kedario eong' cut,

¹⁰ naarai idari ijo eong' kamaka apedor ka atwanare. Ejaanakini eong' ijo kamunokina, bobo mam ijo kinyekini eong' akilom akwap ka lukatwak.

¹¹ Itodikini ijo eong' eroto lo elosi akijar; kainakiit eong' ajaus kon ailel na epolo noi bobo kainut eong' alakara na mam kedaun.