Isabulin 143 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote aking'arasit

¹ Kiira akilip kang' Lokapolon! Kadolite kon, kiira akimony kang'; kinyakakine eong' kamunokina kon.

² Mam akitama eong', lokejaanakinan kon! Mam itwan ipede ni edolit koking'aren kon.

³ Amejata eong' ipading'atin kang' bobo elanyata eong'. Epiakisi eong' aenis na iriono, bobo aputosi eong' kang'ulu lu abutu kotwakata sek.

⁴ Kanuka ng'un alokokina eong' akikiar akanin; ajei eong' apason na epolo noi.

⁵ Eituuti eong' apaarasia nu atuborosi; keituni eong' kuju ka ng'unu kere kanu isoma ijo, eituuti eong' asomisio kon kere.

⁶ Ekiekiit eong' ijo akanin kang' elipi; kwape ka alipo kanu ewokito, edauti emoyo kang' akure kanu kon.

⁷ Kobong'okine eong' kipokona, Lokapolon! Adauni eong' akiyuun kere. Mam ang'opikin eong', kemam, ajaikinosi eong' nenipe ka ng'ulu kalu elosete akwap naka lukatwak.

⁸ Kisiitokine eong' ng'ini taparacu kuju ka amina kon na emam esial, naarai amunokiit eong' ijo. Elosete alipasia kang' kuju nama kon; kitodikine eong' eroto lo itemokina eong' akigwap.

⁹ Abuni eong' nama kon tetere idario eong', Lokapolon; koyuune eong' kamaka ipading'atin kang'.

¹⁰ Irait ijo Akuju kang'; kisisianak eong' kesoma nu ikote ijo. Kojokuna kama kang', bobo koyaite eong' koroto kalo ejokuna.

¹¹ Koyuune eong', Lokapolon kwape isumunikina ijo eong', kajokus kon koyuu eong' kocani kang'.

¹² Kanu iminare ijo eong', kwaara ipading'atin kang', bobo komudia lukesicanete eong' kere naarai arait eong' lokejaanakinan kon.