Isabulin 141 - AKITUTUKET NAKITETET (NEPEPEKA ISABULIN KA AWARAGASIA)

Akilip naka atabong'

¹ Eworoe eong' ijo, Lokapolon; king'arak eong' kipokona! Kopupok eong' na anyaritere eong' ijo.

² Kidiau akilip kang' bala ibore ni ekukuny, na ekiara eong' akanin kang' kuju kocamakine eong' bala isubanit nika atabong'.

³ Lokapolon, mam ajalakin eong' kener nukarokok, kidara akituk kang'.

⁴ Kidara eong' tetere mam eong' kesomae nukarokok, komam eong' kemorikikinosi ka itung'a lukarokok karokusio kes. Elipit eong' komam eong' kamorete ka kesi kopucin kes atikere apaaran apede.

⁵ Ebeikinete itung'a lukajokak akisican ka akiretanakin eong' kajokus, konye mam eong' kacamuni akitamao naka itung'a kaluka arokusio, naarai ng'ini pak elipi eong' etepegi arokusio kes.

⁶ Na edacunere ijakaa kes kwap alomun komor, ebunete itung'a acamun ebe keraito akiro kang' nuka abeite.

⁷ Kwape ka akito kanu ibelite ka akibetebet, nes ekipone lo isiarakina akojo kes osial ka ates.

⁸ Konye etolosit eong' amunokiite ijo, Lokapolon kang' loka apedor kere. Akote eong' akidaro kon mam akinyekin eong' katwana!

⁹ Kidara eong' kaloketa kanu elokokite eong', kidara eong' kaloketa kang'ulu kalukarokok.

¹⁰ Kinyek kibirokinosi lukarokok ikulopek aloketa kes na alosia eong' emam kikang'asite eong'.