Isabulin 138 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akiyalama

¹ Eyalamikiit eong' ijo Lokapolon ketau kang' kere; eturi eong' ijo koking'aren ka akujun.

² Etee eong' Etogo kon, ka akilur kwap, ka akiturite ekiror kon kanuka amina kon na emam esial nepepe ka amuno, kanu itodiara ijo ebe ekiror kon ka acorasia kon epoloko.

³ Ibu ijo kinyakaki eong' na eworitere eong' ijo; ibu ijo kisicata eong' kagogong' kon.

⁴ Ebunete ijakaa kere ka akwap akiturite ijo, Lokapolon, naarai eirasi kesi asumuneta kon.

⁵ Ebunete kesi ekiruke kuju kanu isoma ijo nepepe ka akibusesu kon nakapolon.

⁶ Atikere kijii ijo kuju cut, ipodo ijo kuju ka ng'ulu kalu ejaasi kwap, bobo luka epogi mam kebeikinete ang'opikin ijo.

⁷ Na erimokinata eong' icani, idari ijo eong' kojokan. Itepegi ijo ipading'atin kang' lu ekadakiito ka ayuuni eong' kagogong' kon.

⁸ Ibuni ijo asoma ng'in ibore ni isumuniki ijo; Lokapolon, amina kon na emam esial. Kirikaki asoma nu igeu ijo.