Isabulin 135 - AKITUTUKET NAKITETET (NEPEPEKA ISABULIN KA AWARAGASIA)

Ekosio loka Akitur Akuju

¹ Kiturwoto Lokapolon! Kiturwoto ekiror keng', osi lukejaanakinak ka Akuju,

² lu igwoete ko Otogo ka Lokapolon, ko Otogo ka Akuju wok.

³ Kiturwoto Lokapolon naarai ejokuna nesi; kiturwoto ekiror keng', naarai ejokuna nesi.

⁴ Abu nesi koseu Yakobo araus lokeng', itung'a luko Israel araus lukeng'.

⁵ Ajeni eong' ebe epolo Lokapolon wok, epolo adepar akujun kere.

⁶ Isomae nesi nu ekote nesi asoma kokuju kiton kwap, ka akaren nepepe ka akipi kere nu iduloro.

⁷ Eyaunene nesi idowon luka akiru alomun kosial kakwap; eyaunene nesi akiru na epolo noi, bobo eyaunene nesi akaale kokiding' kakiruruma kidowon, ka akutun ekuwam alomun kodula keng'.

⁸ Ko Misiri abu nesi kwaara idwe kere lusodit ka ityeng' kere lusodit.

⁹ Abu nesi kang'ina kisoma akitodiareta ka aumosia kanuka akisicana ejakait ka ofisan keng' kere.

¹⁰ Abu nesi komudia akwapin nu ipu ka akiyara ijakaa luka agogong' noi:

¹¹ Siyon, ejakait loka itung'a kaluko Amori, Og, ejakait loko Basan, nepepe ka ijakaa kere ko Kanan.

¹² Abu nesi koinaki itung'a keng' amaata kes; abu nesi kigwaaki kesi akanin ka Israel.

¹³ Lokapolon, ebunio akiturite ijo ng'in pak ng'in auri ebuni akiitute ijo.

¹⁴ Ebuni Lokapolon akigang' itung'a keng'; ebuni akisoni itung'a keng'.

¹⁵ Akujun nu ka akwapin esubite ka epuesa ka esawabu; ejeite kesi ka akanin ka itung'a.

¹⁶ Ejaasi kesi akituke, konye mam kebeikinete ejori, ejaasi ka akonyen konye mam kiteete.

¹⁷ Ejaasi kesi ka akii konye mam kepupete mam cut kebeikinete akiyeng'a.

¹⁸ Elipit eong' ng'ulu kere lu esubete akujun ka amunokiite kesi koputokinosi ka kesi akujun nu asubata kesi!

¹⁹ Kiturwoto Lokapolon, osi itung'a luko Israel; kiturwoi nesi, osi isaseredootin ka Akuju!

²⁰ Kiturwoto Lokapolon, osi Ilebin; kiturwoto nesi, osi kere lu imaete nesi!

²¹ Kiturwoto Lokapolon ko Sayon, ko Yerusalem, ere keng'. Kiruroto Lokapolon!