Isabulin 12 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote Aking'arasit

Nama kalo epolokiit ekiruke: Atupa ka Seminit. Ekiruke ka Daudi.

¹ King'arak siong', Lokapolon! Emam itwan nikajokan ideuna; emam cut itung'a lumunokina bobo kedaunosi.

² Kesi kere ing'alasi ikulopek; ing'alasi kesi ka aliokonu.

³ Okwai Lokapolon, kitatau tii akituke ng'unu nu ing'alaete! Kogolok akituke ng'unu nu ipogasi ebalasi,

⁴ “Ka akiro kosi, idumunete siong' nu ikotosi siong'. Itemarete siong' nu ikotosi siong' atemar, bobo emam itwan ni ebeikini akirebokin siong'.”

⁵ Ebala Lokapolon, “Konye kipokona abuuti eong', naarai enuyarite ng'ulu lu ekadada, bobo emonyete kotoma apipilu ng'ulu lu isicanio. Ainakini eong' kesi akidario na ekotosi kesi.”

⁶ Asumuneta ka Lokapolon amunokin; eraito abeite bala epuesa lo kicweit akimi kakanykaare.

⁷ Kidara siong' Okwai Lokapolon, kidara siong' ng'ini pak kauri kanakaronon.

⁸ Elosiete lukarokok kang'olo wai, kwape itopoloriter arokusio kokiding' ka isapa ka ikiliok.