Isabulin 119 - AKITUTUKET NAKITETET (NEPEPEKA ISABULIN KA AWARAGASIA)

Ekisil ka Lokapolon

¹ Erereng' ng'ulu lu emam aronus kejii toma akijar kes, lu iboyete atupa ka ekisil ka Lokapolon.

² Erereng' ng'ulu lu igwapito acorasia keng', lu eyong'ito nesi kitawon kes kere.

³ Mam kesi kisomaete arokusio; etupito kesi irotin ka Lokapolon.

⁴ Akuju, iinaki ijo siong' ikisila kon ka alimokin siong' ayong'ite kesi kamunokina.

⁵ Kere kejii ekipone abeikinar eong' amunokin kotoma aricakite acorasia kon.

⁶ Katamaa eong' arici acorasia kon kere, mam kitisilikino eong'.

⁷ Abuni eong' akiturite ijo ketau kalo ideere, etolosit eong' akisisia ikisila kon lu edolito.

⁸ Ayong'i eong' ikisila kon; mam akinyekin eong'!

Ayong'ite ikisila ka Lokapolon

⁹ Ikote lukatumunak idarete akijar kes kokipone ka Lokalaunan ai? Erait kokipone kaloka ayong'ite acorasia kon.

¹⁰ Atamakini eong' ayong'ite ijo ketau kang' kere; mam akinyekin eong' anwang'i acorasia kon.

¹¹ Aricaki eong' akirot ko otau kang', tetere mam eong' kesomakini ijo arokusio.

¹² Eturi eong' ijo Okwai Lokapolon; kisisianakine eong' irotin kon.

¹³ Abuni eong' akinyogonokin ikisila kon kere lu idau ijo ainakini eong'.

¹⁴ Amina eong' atupite ikisila kon adepar ajaus ka abara kana epolo noi.

¹⁵ Esisiae eong' acorasia kon; amoe eong' akisisianakino kon.

¹⁶ Ketalakarit eong' ikisila kon; mam kimuruokini eong' acorasia kon.

Alakara kotoma ekisil ka Akuju

¹⁷ Kojokuna kama kang', lokejaanakinan kon, tetere abeikini eong' akijar ka ayong'ite akisisianakino kon.

¹⁸ Kong'aa akonyen kang' tetere abeikini eong' akitere abeite naka akitim na ejii toma okisil kon.

¹⁹ Ajei eong' akwap ne ka apak kana edit along'u; mam akigwa acorasia kon kama kang'.

²⁰ Epipil etau kang' ejaasi ka aminanar na epolo noi ekote eong' ajenuni acorasia kon.

²¹ Iretanakini ijo luka epogi, ilamama ng'ulu lu enwang'ito acorasia kon.

²² Kolacune eong' alaomun kamaka araton nepepe ka anwang'ite kes eong', naarai aricaki eong' ikisila kon.

²³ Lukepugak iriamanakinosi ka alokite eong', konye abuni eong' akisisia akisisianakino kon.

²⁴ Akisisianakino kon erait alakara kang'; eraito kesi nukecorak kang'.

Akukunyanuut ayong'ite Ekisil ka Akuju

²⁵ Aperi eong' kapua ilanyite; kinyakakine eong' akijar nakitet, kwape kisumunikitere ijo eong'.

²⁶ Abu eong' keyamo ng'unu kere nu esomat eong', kinyakakini ijo eong'; kisisianak eong' ikisila kon.

²⁷ King'araki eong' ajenun ikisila kon, bobo abuni eong' awomowomo kuju ka akisisianakino kon nuka aumosit.

²⁸ Kelanyat eong' ican; kisicata eong', kwape isulwanyikina ijo eong'.

²⁹ King'araki eong' mam apayaari eroto lokaronon, kajokus kon kisisianak eong' ekisil kon.

³⁰ Aseu eong' ayong'ara; aricaki eong' kuju ka atubokino kon.

³¹ Ariciti eong' acorasia kon, Lokapolon; mam akinyekin ketisilikino eong'.

³² Abuni eong' akiyong' acorasia kon, naarai ibuni ijo akiyatakin eong' acoa.

Akilip kanuka akote akijen

³³ Kisisianak eong', Lokapolon apolou naka ikisila kon, bobo abuni eong' ayong'ite kesi apakio kere.

³⁴ Kisisianak eong' apolou naka ekisil kon, abuni eong' akiyong' ekisil; abuni eong' akiyong' ekisil ketau kang' kere.

³⁵ King'arak eong' ayong'ite ikisila kon naarai adumuni eong' alakara kotoma kes.

³⁶ Koinaki eong' amina naka ayong'ite ikisila kon adepar adumun abara.

³⁷ King'araki eong' tetere mam eong' ketee iboro luka along'u; kojokuna kama kang', kwape kisumunikina ijo eong'.

³⁸ Kisomaki eong' nu ibu ijo kisumunik eong', lokejaanakinan kon — asumunet na isumunikini ijo ng'ulu lu eyong'ito ijo.

³⁹ Koyuune eong' karaton kana akuriana eong'; naarai ejooka acorasia kon noi!

⁴⁰ Akote eong' ayong'ite acorasia kon; koinaki eong' akijar nakitet, naarai idolit ijo.

Amunokiite Ekisil ka Akuju

⁴¹ Kitodik eong' ekipone lo iminare ijo eong', Lokapolon, bobo koyuu eong' atupa ka ekisil kon.

⁴² Kanuka ng'un, abeikini eong' akinyakakin ng'ulu lu erasete eong' naarai amunokiit eong' akirot kon.

⁴³ Koinaki eong' apedor naka ejori abeite ng'ini pak, naarai amunokiit eong' ikisila kon.

⁴⁴ Abuni eong' ayong'ite ikisila kon ng'ini pak, ikaru kere.

⁴⁵ Abuni eong' akijar alakakina noi, naarai atamakiit eong' ayong'ite akisisianakino kon.

⁴⁶ Abuni eong' alimor kuju ka acorasia kon kamaka ijakaa bobo mam kesilikini eong'.

⁴⁷ Adumuut eong' alakara kayong'ite acorasia kon, naarai amina eong' acorasia.

⁴⁸ Ayong'it eong' bobo amina eong' ikisila kon; awomowomoe eong' kuju ka ikisila kon.

Akicasite kotoma okisil ka Akuju

⁴⁹ Kiitute nu isumunikiit ijo eong', lokejaanakinan kon; koinaki eong' amuno.

⁵⁰ Atikere na ajaare eong' ocani kang' apon king'aing'ai eong' naarai abu asumunet kon koinaki eong' akijar.

⁵¹ Ng'ini pak akwenatatare luka epogi eong', konye mam eong' kenyekiit ekisil kon.

⁵² Eituuti eong' ikisila kon luka isek, bobo kitililimito eong', Okwai Lokapolon.

⁵³ Na etoo eong' luka arokusio ebilibilete ekisil kon, ilelebunun eong' anyunyura noi.

⁵⁴ Kapaki kang' kana euriana ka akwap ajei eong' ikirukesinoi kuju ka acorasia kon.

⁵⁵ Kware eitunene eong' ijo, Lokapolon, bobo eitunene eong' kuju ka ekisil kon.

⁵⁶ Adumunene eong' alakara kang' kotoma ayong'ite acorasia kon.

Ayong'ite Ekisil ka Akuju

⁵⁷ Irait ijo ng'ini ibore ni akote eong', Okwai Lokapolon; esumuniki eong' akiyong' ikisila kon.

⁵⁸ Elipit eong' ijo ketau kang' kere akisoni eong' kwape esumunikina ijo!

⁵⁹ Etee eong' iponesio kang', kanuka ng'un esumuniki eong' akigwapa acorasia kon.

⁶⁰ Emam adaute akolong', eburiburi eong' ayong'ite acorasia kon.

⁶¹ Alokata luka arokusio eong', konye mam kimuruokini eong' ekisil kon.

⁶² Kiding' kakware anyouni eong' akiturite ijo kanuka atubonokin kon kana edolit.

⁶³ Arait eong' aupasia ka ng'ulu kere lukijaanakinete ijo, ka ng'ulu kere lu eyong'ito ikisila kon.

⁶⁴ Lokapolon, ileleba amina kon na emam esial toma akwap; kisisianak eong' ikisila kon.

Ajokun naka Ekisil ka Akuju

⁶⁵ Iricaki ijo asumunet kon Lokapolon, bobo ijokuna ijo kama kang', lokejaanakinan kon.

⁶⁶ Koinakine eong' acoa ka akijen, naarai amunokiit eong' acorasia kon.

⁶⁷ Iring'a ijo kitisilara eong', apacanari eong', konye kipokona ayong'it eong' akirot kon.

⁶⁸ Ijokuna ijo noi — bobo isomae ijo nukajokak! Kisisianakine eong' acorasia kon.

⁶⁹ Enerata luka epogi aliokonu kuju kang', konye ayong'it eong' acorasia kon ketau kang' kere.

⁷⁰ Mam kesi kejenete, konye adumuut eong' alakara kotoma okisil kon.

⁷¹ Ajokuna akitisilaro kon kama kang', naarai abu king'araki eong' akisisia acorasia kon.

⁷² Ekisil lo ibu ijo koinaki eong' ajokuna kama kang' noi adepar abara kere naka akwap.

Abeite ka Ekisil ka Akuju

⁷³ Ibu ijo kosub eong', ka akidara eong' kojokan; koinaki eong' akijen tetere esisiauni eong' ikisila kon.

⁷⁴ Ng'ulu lu eyong'ito ijo ebunete alakari kaanyutu eong', naarai amunokiit eong' asumunet kon.

⁷⁵ Ajeni eong' Lokapolon ebe atubonokin kon edolit, bobo kitisilari ijo eong' naarai imunokina ijo.

⁷⁶ Kinyek amina kon na emam esial king'aing'a eong', kwape kisumunikina ijo eong', lokejaanakinan kon.

⁷⁷ Kitimoe eong', kajara eong' kanu alakara eong' asoma ekisil kon.

⁷⁸ Kinyek kosilik luka epogi kanuka akiwosa eong' aliokonu; konye eong' abuni awomowomo kuju ka acorasia kon.

⁷⁹ Kinyek ng'ulu lukiyong'ito ijo kobutu nama kang' ng'ulu kere lu ejenete acorasia kon.

⁸⁰ Kinyek kayong' eong' ikisila kon kojokan tetere mam kasilikini eong'.

Akilip kanuka alakunio

⁸¹ Adaun eong', Lokapolon ederit koyuu ijo eong'; epiakit eong' amunokina kang' akirot kon.

⁸² Apasata akonyen kang' akidarite nu ibu ijo kisumunik, Eng'isit eong', “Iwori ing'arakina ijo eong'?”

⁸³ Arait eong' along'u bala ejamu lo edakitere ebino lokecakar; konye mam eong' kemuruokiit acorasia kon.

⁸⁴ Ketolot eong' akidarite apak na etia ai? Iwori itisilaara ijo ng'ulu lu isicanete eong'?

⁸⁵ Luka epogi, lu mam keyong'ito ekisil kon, abokata aduyon akilok eong'.

⁸⁶ Ikisila kon kere eraito lu munokina; kesicanete itung'a eong' ka aliokonu — king'araki eong'!

⁸⁷ Apu kesi akiyara eong', konye mam eong' kanwang'it acorasia kon.

⁸⁸ Kanuka amina kon na emam esial, kojokuna kama kang', tetere abeikini eong' akiyong' ikisila kon.

Amunokiite Ikisila ka Akuju

⁸⁹ Ebuni akirot kon Okwai Lokapolon ajaikin kokaru kere; erait naka ikaru kere kokuju.

⁹⁰ Amuno kon ideun kauri kere; ipiaki ijo akwap alaro keng', bobo edeun.

⁹¹ Edeunosi iboro kere akitodol lolo kanuka acorasia kon, naarai eraito kesi kere lukejaanakinak kon.

⁹² Kere komam koraite ebe toma okisil kon nes elomuuter ailel kang', ati eong' kadau atwanare kanuka ican kang'.

⁹³ Mam eong' kanwang'i acorasia kon, naarai akitor acorasia kon nes ajaria eong'.

⁹⁴ Arait eong' nikon — koyuu eong'! Atamaki eong' ayong'ite acorasia kon.

⁹⁵ Idarito luka arokusio akiyara eong', konye abuni eong' awomowomo kuju ka ikisila kon.

⁹⁶ Ajenu eong' ebe ng'ini ibore ejaasi ka esial; konye ekisil kon ejokuna.

Amina Ekisil ka Akuju

⁹⁷ Amina eong' ekisil kon! Eitunene eong' kuju keng' apaaran kere.

⁹⁸ Ajaasi eong' ka ekisil kon ng'in pak Kainakiit ekisil kon eong' ajaus ka acoa adepar ipading'atin kang', kainakit eong' acoa adepar ipading'atin kang'.

⁹⁹ Ajeni eong' noi adepar lukesisianakinak kang' kere, naarai awomowomoe eong' kuju ka acorasia kon.

¹⁰⁰ Ajaasi eong' ka acoa adepar ng'ulu lu emojong'ito, naarai ayong'it eong' acorasia kon.

¹⁰¹ Ang'ere eong' asoma nukarokok kere, naarai akote eong' ayong'ite akirot kon.

¹⁰² Mam eong' kanwang'it acorasia kon, naarai irait ijo elope lokesisianakinan kang'.

¹⁰³ Ejijimak acorasia kon kama kang'; ejijimak noi adepar esik!

¹⁰⁴ Adumunene eong' acoa kokisila kon, kanuka ng'un, mam eong' kamin iponesio kere lukarokok.

Acaus na elomuut kokisil ka Akuju

¹⁰⁵ Erait akirot kon atara kang' na eyait eong' ka acaus na ecae koroto kang'.

¹⁰⁶ Abuni eong' aricakin asumunet kang' naka ayong'ite acorasia kon nuka abeite.

¹⁰⁷ Okwai Lokapolon Akuju, ecana eong' noi; koinaki eong' akijar kwape isumunikina ijo.

¹⁰⁸ Kocamu akilip kang' naka akiyalama, Okwai Lokapolon, bobo kisisianak eong' ikisila kon.

¹⁰⁹ Ejii akijar kang' akang'as ng'ini pak, konye mam eong' kenyekini ikisila kon.

¹¹⁰ Elokito lukarokusio eong', konye mam eong' kenyekini ikisila kon.

¹¹¹ Ikisila kon eraito iboro lukang' ikaru kere; italakaarito kesi etau kang'.

¹¹² Atiaku eong' ayong'ite ikisila kon akitodol apaaran na atwania eong'.

Akidaro na ejii toma Okisil ka Akuju

¹¹³ Mam eong' kamina ng'ulu lu imoleete mam keyong'ito ijo, konye amina eong' ekisil kon.

¹¹⁴ Ijo nes ebuku kang' bobo lokedaran kang'; epiakiit eong' akiyuun kang' toma asumunet kon.

¹¹⁵ Koikasi kama kang', osi itung'a lukarokok. Abuni eong' akiyong' acorasia ka Akuju kang'.

¹¹⁶ Koinaki eong' agogong', kwape kisumunikiitere ijo, kajara eong'; mam akinyekin eong' asilikin kotoma amuno kang'!

¹¹⁷ Kirum eong', kajara eong', bobo abuni eong' ng'in pak akipup acorasia kon.

¹¹⁸ Ing'eri ijo ng'in itwan ni enwang'it ikisila kon; akitemetemesio kes eroko emam adumunet apede.

¹¹⁹ Iyait ijo itung'a kere lu isomaete nukarokok bala iboro lukarokok, kanuka ng'un amina eong' acorasia kon.

¹²⁰ Akuriana eong' kanu kon; ileleba eong' akurianu kanuka atubonokin kon.

Ayong'ite Ekisil ka Akuju

¹²¹ Esoma eong' nu edolito kanu ejooka; mam akinyekin eong' kamaka ipading'atin kang'!

¹²² Kisumunik ebe ing'arakini ijo ekejaanakinan kon; mam akinyekin luka epogi konwang'ata eong'!

¹²³ Apasata akonyen kang' akidarite aking'arasit kon na iyuuni eong', naarai ibu ijo kisumunik eong'.

¹²⁴ Kisomaki eong' atupa ka amina kon na emam esial, bobo kisisianak eong' acorasia kon.

¹²⁵ Arait eong' lokejaanakinan kon; koinaki eong' akijen tetere abeikini eong' ajenun akisisianakino kon.

¹²⁶ Lokapolon, na nes apak kon naka akisomakin, naarai mam itung'a keyong'ito ekisil kon.

¹²⁷ Amina eong' ikisila kon adepar esawabu, adepar esawabu lo isidonyonyo.

¹²⁸ Kanuka ng'un, atupitt eong' ikisila kon kere; mam eong' kamina irotin kere lukarokok.

Akote ayong'ite Ekisil ka Akuju

¹²⁹ Ejooka ikisila kon; ayong'it eong' kesi ketau kang' kere.

¹³⁰ Akiro nu inerasi akisisianakino kon eyaunete acaus; einakinete lu ebang'aaka acoa.

¹³¹ Ang'aarit eong' akituk kang' akote eong', naarai akote eong' noi acorasia kon.

¹³² Kobong'okine eong', kitimoe eong' kwape isomakina ijo ng'ulu lu eminasi ijo.

¹³³ Kwape isumunikina ijo, kidar eong' komam eong' kebiror; mam akinyekin aronus kilanyat eong'.

¹³⁴ Koyuune eong' kamaka ng'ulu kalu iyimakito eong', tetere abeikini eong' ayong'ite ikisila kon.

¹³⁵ Kocaki akonyen kang' kajokun kon, kisisianakine eong' ikisila kon.

¹³⁶ Eleleete akiyo kang' bala ang'olol, naarai mam itung'a keyong'ito ekisil kon.

Abeite ka Ekisil ka Akuju

¹³⁷ Idolit ijo, Lokapolon bobo ikisila kon eraito luka abeite.

¹³⁸ Ikisila lu ilemu ijo ejooka cut bobo edolito.

¹³⁹ Inepi anyunyura kotoma kang' bala akimi, naarai enwang'ito ipading'atin kang' acorasia kon.

¹⁴⁰ Erait asumunet kon naka abeite! Amina eong' noi!

¹⁴¹ Arait eong' itwan ni emenite bobo enwang'ite eong', konye mam eong' kanwang'it akisisianakino kon.

¹⁴² Adolite kon iboye ikaru kere, bobo ekisil kon erait loka abeite ng'in pak.

¹⁴³ Ileleba eong' ican ka apodo, konye kainuto eong' ikisila kon ailel.

¹⁴⁴ Eraito acorasia kon nuka abeite ng'in pak; koinaki eong' akijen kasodi eong' akijar.

Akilip kanuka alakunio

¹⁴⁵ eworoe eong' ijo ketau kang' kere; kobong'okine eong' Lokapolon, kasodi eong' akiyong' acorasia kon!

¹⁴⁶ Eworoe eong' ijo; koyuu eong', aricakini eong' ikisila kon.

¹⁴⁷ Ering'a akolong' kelomuna eworoe eong' aking'arasit kon; epiaki eong' amunokina kang' asumunet kon.

¹⁴⁸ Akwaare kere, ekolerit eong', awomowomoe kuju ka ikisila kon.

¹⁴⁹ Kanu eraitere amina kon na emam esial, kiira eong' Lokapolon; kisoni eong', kidara akijar kang'.

¹⁵⁰ Apuutu lukesicanak kang', itung'a lu mam kericakiito ekisil kon.

¹⁵¹ Konye apie ijo kama kang', Lokapolon, bobo ikisila kon kere eraito luka ikaru kere.

¹⁵² Abu eong' sek kesisiau ikisila kon; ibu ijo koinaki kesi ideunosi ikaru kere.

Akilip aking'arasit

¹⁵³ Kong'olek akicana kang', koyuu eong', naarai mam eong' kanwang'it ekisil kon.

¹⁵⁴ Kigang'a eong', bobo koyuu eong'; koinaki eong' akijar kwape sek isulwanyikina ijo eong'.

¹⁵⁵ Mam kiyuuno lukarokok, naarai mam kesi keyong'ito ikisila kon.

¹⁵⁶ Konye akisoni kon Lokapolon, epolo noi; kisoni eong' bobo koyuu eong'!

¹⁵⁷ Ajaasi eong' ka ipading'atin nepepe kalu eyimakito eong' ipu noi, konye mam eong' kang'eri ayong'ite ikisila kon.

¹⁵⁸ Kaanyu eong' lukagwelanarak ng'ulu, ekadakin etau kang', naarai mam kesi kericakito acorasia kon.

¹⁵⁹ Kong'olek kwape aminare eong' acorasi kon, Akuju. Mam amina kon na emam esial kibelonokin, kanuka ng'un koyuu eong'!

¹⁶⁰ Etau ka ekisil kon erait abeite; bobo ikisila kon kere lu edolito eraito luka ikaru kere.

Alemikina kamaka ekisil ka Akuju

¹⁶¹ Kalomikito eong' itung'a luka agogong' along'u, konye ayong'it eong' ekisil kon.

¹⁶² Alakara eong' noi kanuka asumunikinete kon bala itwan ni edumuni iboro lukajokak.

¹⁶³ Mam eong' aliokonu, konye amina eong' ikisila kon.

¹⁶⁴ Keturi eong' ijo ng'ini paaran irwana kakanykaare kanuka atubokino kon kana edolit.

¹⁶⁵ Ng'ulu lu eminasi ekisil kon ejaasi ka aipuc na ejokuna noi; bobo emam ibore ni ebeikini akibiror kesi.

¹⁶⁶ Edarit eong' koyuu eong' Lokapolon, bobo esomae eong' nu icori ijo.

¹⁶⁷ Ayong'it eong' akisisianakino kon; amina eong' kesi ketau kang' kere.

¹⁶⁸ Ayong'it eong' acorasia kon ka ikisila kon; itee ijo ng'ini ibore ni esomae eong'.

Akilip kanuka aking'arasit

¹⁶⁹ Kodoloki ijo akimonyo kang', Okwai Lokapolon; koinaki eong' akijen atupa ka asumunikinete kon!

¹⁷⁰ Kiira akilip kang', bobo koyuu eong' atupa ka asumunet kon!

¹⁷¹ Abuni eong' akiturite ijo ng'in pak, naarai isisianakini ijo eong' ikisila kon.

¹⁷² Abuni eong' ekiruke kuju ka ekisil kon, naarai acorasia kon edolito.

¹⁷³ Kolokokina ng'in pak aking'arakin eong', naarai egwapit eong' acorasia kon.

¹⁷⁴ Ederit eong' koyuu ijo eong', Okwai Lokapolon! Bobo alakara eong' asoma ekisil kon.

¹⁷⁵ Koinaki eong' akijar, tetere keturi eong' ijo; kigang'ata ikisila kon eong'.

¹⁷⁶ Erimi eong' kwape ka amerekek kana ewolit; kanuka ng'un, kobuu kokoo eong', lokejaanakinan kon, naarai mam eong' kenyekiit ikisila kon.