Isabulin 110 - AKITUTUKET NAKITETET (NEPEPEKA ISABULIN KA AWARAGASIA)

Lokapolon nepepe ka Ejakait keng' Loseuna

¹ Kolimokini Lokapolon ejakait kang', “Kiboikin teten kang', kegwaaki eong' ipading'atin kon kwap kakejen kon.”

² Alomun ko Sayon ebuni Lokapolon akiyatakin apugan kon. Ebala nesi, “Kipuga ipading'atin kon.”

³ Apaaran na itijia ijo ipading'atin kon, ebunete itung'a kon alemun. Kwape ka akopio kanuka taparacu ebunete isapa kon nama kon komoru kalo elae.

⁴ Abu Lokapolon kolemu asumunet bobo mam nesi kibelokini, “Irauni ijo esaseredootit ikaru kere atupa ka akitemetemio nuka Melkisedek naka araus isaseredootin.”

⁵ Ejei Lokapolon akan kon nako teten; kenyunyuraar nesi, ebuni nesi akilanya ijakaa.

⁶ Ebuni nesi atubonokin akwapin ka akilelebe nama ejiore kawate ka lukatwak; ebuni nesi akilanya ijakaa ka akwap kere.

⁷ Ebuni ejakait akimata kocori kalo ejii wai keroto, kisicasi nesi ebuni nesi akigwoo erait nikelanyan.