Isabulin 11 - AKITUTUKET NAKITETET (NEPEPEKA ISABULIN KA AWARAGASIA)

Amunokiite Lokapolon

Nama kalo epolokiit ekiruke. Loka Daudi.

¹ Amunokiit eong' Lokapolon akidara eong'. Ikote osi ibang'aaka ai alimokin eong', “Koporoo bala ikwenyi kuju omoru,

² naarai alemutu itung'a lukarokok akabwai kes ka akote ikojoi kes akigum kotoribei itung'a lukajokak.

³ Kemudiar apeteta, inyena isomakini itwan ni edolit?”

⁴ Ejii Lokapolon otogo keng' lokalaunan; ekicolong' kaloka Lokapolon ejii kuju. Akonyen keng' iteete, abukoo keng' itemete, idwe ka etung'anan.

⁵ Etami Lokapolon lukarokok kalu edolito, bobo ereit nesi itung'a lu eminasi ejie.

⁶ Ebuni nesi akijukakin luka arokusio atotol nuka akimi ka esalfa lo enoki; Itisilari nesi kesi kekuwam kalo emwana.

⁷ Edolit Lokapolon, bobo emina nesi aswamisio nukajokak; ng'ulu lu isomaete aswamisio nukajokak ebunet akiboi kama ejii nesi.