Isabulin 109 - AKITUTUKET NAKITETET (NEPEPEKA ISABULIN KA AWARAGASIA)

Akimonyo naka itwan kani icana

Nama kalo epolokiit ekiruke. Ekiruke ka Daudi.

¹ Eturi eong' ijo Akuju; mam akideun itaa ti!

² Kalomikisi eong' lukarokok ka iliokoikis. Inerasi aliokonu kuju kang'

³ bobo inerasi iboro lukarokok kuju kang', kalomikiito eong' emam atenikina.

⁴ Ereito kesi eong' konye amina eong' kesi bobo elipaki eong' kesi.

⁵ Etacate kesi ajokus kang' ka arokusio etacete kesi amina kang' ka akadakiite.

⁶ Koseu lokatubonokinan eliokoi kotuboki epading'a kang', bobo kinyek epe kamaka ipading'atin keng' kiwosa nesi.

⁷ Kinyek kiwosai nesi kodumun ejaasi ka aronus; kinyek kodumune akilip keng' de eraito aronus!

⁸ Kinyek kodaun akijar keng' atipet; kinyek koyaa itwan ice asoma keng'!

⁹ Kinyek korautu idwe keng' ikokiokok, kinyek korau aberu keng' apuserut!

¹⁰ Kinyek korautu idwe keng' lu ilipanarosi komam kejaasi ka ere; kireng'iare kesi kotogoi kalu kibironorosi kalu iboyata kesi!

¹¹ Kinyek koyaasi ng'ulu lu ejaasi nesi ka apesani kes iboro keng', kinyek koyaasi ilong'au ng'in ibore nikedumuut nesi akitor asoma keng'.

¹² Kinyek komam itwan ipede ni ebuni akisomakin nesi ajokun kere de ni ebuni akitere ikokiok lu inyekini nesi.

¹³ Kinyek kotwana auri keng' kere, kimurwore ekiror keng' ka auri kana etupi.

¹⁴ Kiitu Lokapolon arokusio nuka luka asonya kes bobo mam cut arimakin arokusio nuka toto keng'.

¹⁵ Kiitute Lokapolon ng'ini pak arokusio kes, konye kinyek kimuruokine cut kesi ikulopek!

¹⁶ Amam etwan ng'olo cut abu kiitu asoma ajokun; abu nesi kisican ka akiyara lukapalapalak, lu ajaasi ka akiisite kang'ulu kalu amam kejaasi ka ekipone epede.

¹⁷ Amina nesi akilama — kinyek kilamai nesi! Mam nesi amina akisulwanyinikin itung'a — kinyek komam itwan ipede ni isulwanyikini nesi!

¹⁸ Anaikiit nesi ilami kwape anaikiitere anapienene inapen; kinyek ilami keng' kelope kitabautu akwana keng' bala akipi bobo de kitabautu akojo keng' bala akinyet!

¹⁹ Korapata ilami keng' nesi bala inapen kimanakisi nesi elope ng'ini pak bala arokoba!

²⁰ Lokapolon, kitisila ipading'atin kang' kokipone kang'olo ng'ulu lu inerasi iboro bala ng'ulu kuju kang'!

²¹ Konye Lokapolon Akuju, king'araki eong' kwape isumunikina ijo, bobo koyuu eong' atupa ka ajokus naka amina kon na emam esial.

²² Apalipalit eong' bobo ajaasi eong' ka akiisite; ekang'asi eong' akitodol toma otau.

²³ Kwape ka etolibe kaloka ebong', apu eong' adaun; kakutar eong' bala ecucut.

²⁴ Emam akong'in kang' agogong' kanuka amamus kinyamen; mam eong' karait ibore ipede emam kerait ejamu ka akojo along'u.

²⁵ Na aanyunata itung'a eong' ekwenatatar eong'; imung'umung'ete akwes kes kanwang'ite.

²⁶ King'arakine eong', Okwai Lokapolon, Akuju kang'; kanuka amina kon na emam esial, koyuu eong'!

²⁷ Kitejenu ipading'atin kang' ebe ijo nes eyuuni eong'.

²⁸ Ebeikinete kesi akilama eong', konye ibuni ijo akisulwanyikin eong'. Kilanyai luketisilarito eong', bobo kinyek eong' lokejaanakinan kon kajaasi ka alakara.

²⁹ Kinyek asilutu korapaki ipading'atin kang'; kinyek konapata kesi asilutu bala enaga.

³⁰ Abuni eong' akiyalamikin Lokapolon kang'; abuni eong' akiturite nesi ka atuket ka itung'a,

³¹ naarai igang'it nesi lukapalapalak nepepe ka ayuuni kesi koking'aren kang'ulu kalu etubonokinete kesi kotwakata.