Isabulin 106 - AKITUTUKET NAKITETET (NEPEPEKA ISABULIN KA AWARAGASIA)

Ajokus ka Akuju namaka itung'a keng'

¹ Kiturwoto Lokapolon! Kiyalamikisi Lokapolon, naarai ejokuna nesi; erait amina keng' naka ikaru kere.

² Ing'ai ebeikiit alimor iboro kere lukapolok lu esoma Lokapolon? Ing'ai ebeikiit akiturite nesi nama ilesikina?

³ Erereng' ng'ulu lu eyong'ito acorasia keng', lu isomaete ng'ini pak iboro lu ideerete.

⁴ Kiitute eong' Lokapolon apak na ing'arakina ijo itung'a kon; kimarakiite eong' de na iyuuna ijo kesi.

⁵ Kinyek kaanyu eong' akitolosite kojokan naka itung'a kon ka akimoro alakara naka akwap kon, alakara naka epogi naka ng'ulu kalu eraito lukon.

⁶ Esomata siong' arokusio kwape esomaata luka asonya kosi; ajaikinosi siong' isomaete arokusio.

⁷ Mam luka asonya kosi ko Misiri abutu kojenutu asoma nuka aumosia ka Akuju; abutu kesi kimuruosi irwana ipu nu abu Akuju kitodiki kesi amina keng', kosodete kesi akinwang'a Akuju loka Apedor kere ka Akare kanaka Reng'an.

⁸ Konye abu nesi koyuu kesi, kwape kisumunikiitere nesi kesi, tetere itodiari nesi apedor keng'.

⁹ Kiretakini nesi Akare naka Reng'an, kowonikini; king'arenikini nesi itung'a keng' atubor akare itorito kesi moding'.

¹⁰ Abu nesi koyuu kesi kamaka ng'ulu kalu eng'erito nesi; abu nesi koyuu kesi kamaka ipading'atin kes.

¹¹ Konye abutu akipi kilikosi ipading'atin kes; emam ipede abu kideun.

¹² Kosodete itung'a keng' amunokin asumuneta keng' ka akiturite nesi.

¹³ Konye abutu kesi kimuruokisi atipet nu kisomakiit Akuju kesi kosodete asoma emam akidarakin acorasia keng'.

¹⁴ Kosodi aminanari apoloori noi komoding' kotamete kesi Akuju;

¹⁵ kanuka ng'un koinakini nesi kesi ibore niking'isito kesi, bobo kijukakini nesi kesi adeka nakapolon noi.

¹⁶ Ejaasi kesi moding', kojaikinos kesi ka akadakina ka Musa, ka Aron, lokejaanakinan ka Lokapolon lokalaunan.

¹⁷ Kosodi akwap ang'aari ka akilikor Datan ka arapakin Abiram ka etogo keng';

¹⁸ kobuni akimi otung'a keng' lukigwapito nesi ka akicweikin itung'a ng'ulu luka arokusio.

¹⁹ Kosodete kesi akiten itako emong' nika esawabu ko Sinai kosodete kesi akimaa aputo ng'in;

²⁰ Abutu kesi kibelokisi aibusesu ka Akuju ka akitaraun aputo naka emong' kalo enyemi inya.

²¹ Kosodete kesi akimurwokini Akuju lo ayiuni kesi ka asoma keng' nuka agogong' keng' ko Misiri

²² Abu nesi kisoma aumosia kang'ina! Abu nesi kisoma iboro luka akitim ka Akare kanaka Reng'an.

²³ Na atemara Akuju ebe emudiari nesi itung'a keng', abu lokejaanakinan keng' loseuna Musa kitepege Akuju ka akirebokin anyunyura ka Akuju amudiar kesi.

²⁴ Kanuka ng'un kosodete kesi aking'ere akwap nakajokan, naarai amam kesi abutu komunokisi asumunet ka Akuju.

²⁵ Abutu kesi kibooto kayemai kes ka aking'urung'ura kong'erete akiirar Lokapolon.

²⁶ Kosodi nesi akikwenyar kesi ebe ebeikiit nesi akinyekin kesi komoding'

²⁷ ka akisiarakin auri kes akwapin ka itung'a kalu eng'erito Akuju, ka akinyekin kesi kotwakata ka akwapin kilong'au.

²⁸ Kosodete itung'a ka Akuju ageun akilip Bal ko Peori ka akinyam isuban lukedusite akujun nu etwakito.

²⁹ Abutu kesi kiguruokis anyunyura ka Lokapolon kanuka asoma kes, kosodi adeka nakaronon noi akikamun kesi.

³⁰ Konye abu Fineas kogwo ka akitisilar ng'ulu lukarokok, kirebokinete adeka.

³¹ Emarakin nesi nu eraito adolite ageun kamaka auri kape adolore nama kanace ikaru kere.

³² Abutu kesi koinakisi Akuju anyunyura ko ocorin kaluko Meriba, kosodi Musa adumun kocan kanu kes.

³³ Abutu kesi koinakisi Musa anyunyuraari akitodol na enerare nesi komam atauni ti.

³⁴ Mam kesi abutu kwarata ilong'au, kwape kicorakiitere Lokapolon kesi,

³⁵ konye abutu kesi komanyanakinosi ka kesi ka ageun atupite irotin kes luka itung'a kalu eng'erito Akuju.

³⁶ Abutu itung'a ka Akuju kimaata aputon, kosodi akimaa kes ng'ini ainakin kesi etwakete.

³⁷ Abutu kesi kolemikisi aputon nuko Kanan, isapa kes ka apesur kes bala isuban.

³⁸ Abutu kesi kobukoto awokot nu amam ajaasi ka akirot, awokot nuka isapa kes ka apesur kes, lu apotu kesi koleminikisi aputon nuko Kanan eraito isuban, kosodete akitoron akwap ka awokot.

³⁹ Abutu kesi ikulopek kitoronarosi kasoma kes bobo amam kesi amunokiito Akuju.

⁴⁰ Kanuka ng'un, abu Lokapolon konyunyuraki itung'a keng', bobo abu kokadaki nesi kesi.

⁴¹ Abu Akuju kinyekina kesi itung'a lu eng'erito nesi kipugata kesi, kipugaete ipading'atin kes kesi.

⁴² Abutu ipading'atin kes kiimakis kesi kajaikin kesi kwap ka apugan kes cut.

⁴³ Irwana ipu abu Akuju koyuu itung'a keng', konye koseunete kesi anwang'ite nesi ka akilumokin noi toma arokusio.

⁴⁴ Konye abu Akuju kopupoki kesi na amonyakinata nesi, kiirari nesi akimonyo kes.

⁴⁵ Kanu kes abu nesi kiitu aitutuket keng' nakipiakit nesi ka kesi, bobo kanuka amina keng' kana epolo, kisonie nesi kesi.

⁴⁶ Abu nesi koinaki ng'ulu kere lukisicanete kesi kisonioto kesi.

⁴⁷ Koyuune siong', Okwai Lokapolon Akuju kosi, kinyaku siong' kakwapin, tetere ibeikinete siong' akiyalamikin ka akiturite ekiror kon lokalaunan.

⁴⁸ Kiturwoi Lokapolon, Akuju loko Israel; kiturwoto nesi kipokona ka ikaru kere! Kinyek kotema ng'in itwan ebe, “Ikote nepeneni!” Kiturwoi Lokapolon!