Isabulin 105 - AKITUTUKET NAKITETET (NEPEPEKA ISABULIN KA AWARAGASIA)

Akuju ka Itung'a keng'

¹ Kiyalamikisi Lokapolon, kolimonosi apolou keng'; kolimokisi akwapin nu esoma nesi.

² Kirukokisi Lokapolon; kolimonosi ajokus na esoma nesi.

³ Kolakara kanu iraitetere oni itung'a keng'; kinyekisi ng'ulu kere lu imaete nesi kolakarosi.

⁴ Kolototo namaka Lokapolon king'araki osi; bobo kimaata nesi ng'ini pak.

⁵ Kiitutete aumosia nu abu nesi kisoma, aumosia keng' ka atubonokino na abu nesi kolemu,

⁶ osi auri ka Aburaam lokejaanakinan keng', osi auri ka Yakobo, lu aseu nesi;

⁷ Lokapolon nes Akuju wok; acorasia keng' ejaasi ka agogong' kakwap kere.

⁸ Ebuni nesi akidara akitutuket keng' ikaru kere, isomae nesi asoma asumuneta keng' kauri aritat ape.

⁹ Ericakini nesi akitutuket na abu nesi kipiakisi ka Aburaam, ka asumunet na abu nesi kiyapoki Isaka.

¹⁰ Abu Akuju kigwaaki akitutuket ka Yakobo, akitutuket na ebuni akitoloto ikaru kere.

¹¹ Kotemari nesi ebe, “Abuni eong' ainakin osi akwap nako Kanan. Erauni nakus.”

¹² Adisiaka itung'a ka Akuju, araito ilong'au kakwap kanako Kanan.

¹³ Abutu kesi kirimoto alomun akwap ka akwap nace, alomun ka ajakaanut ajakaanut nace.

¹⁴ Konye amam Akuju abu kojalaki itwan ipede kisicana kesi; erait ekipone loka akigang'ite kesi, abu nesi kikwenya ijakaa ebala ebe,

¹⁵ “Mam akikang'asa lukejaanakinak kang' lu aseuti eong'; mam ajoror lukadwarak kang'.”

¹⁶ Abu Akuju kijukia eteng'e akwap kes kosodi alemar inyamen kes kere.

¹⁷ Konye abu nesi kijukia etwan kogee koking'aren kes, Yosef lokegwelarite bala ejolot.

¹⁸ Keyenite akejen keng' kinyororon, bobo ayenikiite omorising' keng' enyoror loka icumai,

¹⁹ akitodol nakisomakinototor ng'un nukedwaruut nesi. Kebu akirot ka Lokapolon kitodia ebe ideere nesi.

²⁰ Kosodi ejakait loko Misiri ajalakini kolakakine nesi; kolakakini lokepugan akwapin nesi.

²¹ Kipiakini nesi apolokiite apugan keng' ka ainakin nesi apolokiite akwap kere,

²² ka apolokiite ofisan ka ejakait ka apolou naka ayaite ng'ulu lukecorak nesi.

²³ Kosodi Yakobo alosite Misiri kogeuni akiboi kakwap kang'ini.

²⁴ Abu Lokapolon koinaki itung'a idwe ipu koinakini kesi agogong'u adepar ipading'atin kes.

²⁵ Abu nesi koinaki itung'a luko Misiri aking'ere itung'a keng' ka aking'ala lukejaanakinak keng'.

²⁶ Kosodi nesi akijukiar lokejaanakinan keng', Musa ka Aron lokedaut nesi aseun.

²⁷ Abutu kesi kisomata asoma ka Akuju nukapolok noi bobo kisomaete aumosia ko Misiri.

²⁸ Abu Akuju kijukia akirionus akwap, konye mam itung'a luko Misiri akigwap acorasia keng'.

²⁹ Kibelokini nesi ang'ololon kes korautu awokot ka akiyara ikole kes kere.

³⁰ Abutu igereco korapakisi akwap kes, kakilelebun igereco ore ka lokapolon de.

³¹ Kelimu Akuju, kosodete icucu ka ikadepidep akilelebun akwap kere.

³² Kijukuni nesi akako ka ekipie atiare akijukakin kesi akiru;

³³ komunaari nesi ikito kes luka emusabibu kiton ikaereren kosodi nesi apusanar ikito kere luka akwap kes.

³⁴ Kelimu nesi, kobuni emase de, akwap kemase;

³⁵ abutu kesi konyamata ikito kere kakwap; abutu emase konyama iraana kere.

³⁶ Abu nesi kwaara isapa lusodit luka itogoi kere luko Misiri.

³⁷ Kosodi nesi ayaari itung'a luko Israel king'a; koyarete kesi epuesa ka esawabu, kesi kere ang'aleete kicasitete.

³⁸ Akuriaka itung'a luko Misiri kesi bobo alakara kesi na alomarata kesi.

³⁹ Abu Akuju kigwaaki idowon kuju ka itung'a keng' ka akimi kware kanuka ainakin kesi acaus.

⁴⁰ Abutu kesi kilipata, kijukakini Akuju kesi ikweny; abu Akuju koinaki kesi inyamen alomun kokuju kanuka akisimonikin kesi.

⁴¹ Abu nesi kobwang'a amoru, kosodete akipi abukun, eleleete itorito moding' bala ang'olol.

⁴² Abu nesi kiitu asumunet keng' nakisumunikiit nesi Aburaam lokejaanakinan keng'.

⁴³ Kanuka ng'un koyaari nesi king'a itung'a keng' luseuna, kosodete kesi ekiruke kalakara.

⁴⁴ Abu nesi koinaki kesi amaata nuka itung'a kaluce ka akinyekin kesi koyaasi amaata kes,

⁴⁵ tetere eyong'ete itung'a keng' ikisila keng' ka aricakin acorasia keng' kere. Kiturwoi Lokapolon!