Isabulin 104 - AKITUTUKET NAKITETET (NEPEPEKA ISABULIN KA AWARAGASIA)

Akiturite Lokasuban

¹ Kitur Lokapolon, Okwai etau kang'! Okwai Lokapolon Akuju kang', ipolo ijo noi! Inapit ijo apolou ka aibusesu;

² Irapit ijo akwan kon ka acaus. Itera ijo kuju bala ayema

³ ka akiduk ere kon kuju ka akipi. Kidakito ijo idowon, bobo kidakit ijo ekuwam.

⁴ Itosomae ijo ekuwam bala ekiyakia kon ka akitosoma akimilia naka idowon bala lukejaanakinak kon.

⁵ Idukoki ijo akwap apetan keng', bobo mam cut kebuni akisukunyaro.

⁶ Ibu ijo korapak akwap ka akare bala enaga, kosodete akipi arapakin imoru lukaujak.

⁷ Na iretakina ijo akipi, abutu koleliasi abutu komotarosi atipet na eirarata acela kon.

⁸ Abutu koleliasi kwap kimoru ka akilom ajesata, alaro na ibu ijo kitenakiite kesi.

⁹ Ibu ijo kigwaaki eukor ka akipi, tetere emam kesi bobo kerapakinete akwap bobo.

¹⁰ Iinaki ijo icorin elomunete kajesata, ka ang'ololon itorito omoru.

¹¹ Einakiito kesi ityeng' luko moding' akipi. Eculete kang'ina ityeng' luko moding' akure kes.

¹² Kokito kalu epiete kaneni, edukete ikwenyi itogoi kes ka ekiruke.

¹³ Alomun kodowon, ijukuni ijo akiru omoru, bobo ileleba asulwany kon akwap.

¹⁴ Itopolou ijo inya konyamata akituk kitopolouni ijo iraan kitosoma etung'anan, tetere edumuni nesi de inyamen keng'

¹⁵ ka ebino kitalaka kesi, akinyet naka olif kitalaka kesi, ka emugati lo einakini kesi agogong'.

¹⁶ Ikito luka esida luko Lebanon edumunete akiru epolo, ikito ka Lokapolon ka elope, lu erai nesi.

¹⁷ Edukete ikwenyi itogoi kes ng'ina; iboyete ikwenyi kokito.

¹⁸ Iboyete akinei nuko moding' komoru kalu ikiara,

¹⁹ Ibu ijo kosub elapa tetere imario ilapio; ejeni akolong' apak na elomia.

²⁰ Ibu ijo kosub akwaare, bobo elomunete ityeng' kere luko moding' king'a kakirionus.

²¹ Erwosi ing'atunyo lucik na emejaata kesi inyamen kes, ekotosi inyamen lu einanikini Akuju.

²² Na elomuna akolong', ebong'orete kesi ka apero kaduyon kes.

²³ Kosodete itung'a aikar king'a asoma kes ka akitoloto asoma akitodolo ebong'.

²⁴ Lokapolon, isub ijo iboro ipu noi! Ibu ijo kosub kesi kere kacwa noi! Ileleba iboro lu isubit ijo akwap.

²⁵ Ejii akare, euja kolalal nama iboyata iboro lu mam kimarunosi, lukapolok kalucik.

²⁶ Ekerete amelin kaneni, bobo ebolia lefiatan kotoma kaneni, etyang' ng'olo loka akare lo ibu ijo kosub.

²⁷ Kesi kere iteete ijo tetere inakini ijo kesi inyamen apak na ekototore kesi.

²⁸ Iinakini ijo kesi inyamen, konyemete kesi; iinakini ijo kesi inyamen kosodete kesi akimonikin.

²⁹ Kibeloki ijo kesi akaulo kon, ekuriakarosi kesi; kilema ijo euria kon, etwakete kesi kabong'or alipo nama kelomunata kesi.

³⁰ Konye kiinaki ijo kesi euria, ejarete kesi bobo; iinakini ijo akijar nakitetet akwap.

³¹ Kitoloto aibusesu ka Lokapolon ikaru kere! Kolakari Lokapolon kanuka nu esoma nesi!

³² Itee nesi akwap, icekuni akwap; ejoronori nesi imoru, kolomuni apuru.

³³ Erukokini eong' Lokapolon ka akijar kang' kere; kakijar kang' kere erukokini eong' Akuju kang'.

³⁴ Kinyek kitalaka nesi ekiruke kang', naarai alakara kang' elomuut kama keng'.

³⁵ Kolemare kakwap luka arokusio, komam bobo luka arokusio! Kitur Lokapolon, Okwai etau kang'! Kiturwoto Lokapolon.