Isabulin 102 - AKITUTUKET NAKITETET (NEPEPEKA ISABULIN KA AWARAGASIA)

Akilip ka nikatumunan ni Ejii Ocani

Akilip kani icana, epasit nesi kosodi abukun akimonyo keng' namaka Lokapolon

¹ Kiira akilip kang', Okwai Lokapolon, bobo kiira akimonyo kang' naka akote aking'arasit!

² Na ecanare eong', mam ang'opikin eong'! Kiira eong', bobo kinyakakine eong' atipet eworoe eong'!

³ Etubitosi apaarasia kang' bala apuru; inepiete akojo kang' bala akim.

⁴ Ebirokin eong' kwap bala inya lu ewokete; mam etau kang' kekote akinyama.

⁵ Kanuka abilibila ketau kang', edeun akwaan kang' erait akojo usa ka ejamu.

⁶ Ajaikin eong' bala atarukot na ejii okitwi, bala etukuri lo ejii ameje.

⁷ Aperi eong' akwenyi; ajii eong' bala ikwenyi ni telit ejii obibiru ka etogo.

⁸ Karasete eong' ipading'atin kang' apaaran kere; ng'ulu lu ekwenatatare eong' itosomaete ekiror kang' ilamasi.

⁹ Ekuruon nes arau bala inyamen kang', enyali eong' akiyo ka imaten kang',

¹⁰ kanuka adedeng' kon kiton anyunyura kon, iseku ijo eong' ka acakar eong' nama elwana.

¹¹ Erait akijar kang' bala etolibe loka ebong'; ajei eong' bala inya lu ewokito.

¹² Konye ijo, Okwai Lokapolon irait ijo ejakait ikaru kere; ebuni auri kere akiitun ijo.

¹³ Ibuni ijo anyoun ka akisoni Sayon; naarai adolo apak naka akisomakin Sayon nukajokak; adolo apak nakitemokiite.

¹⁴ Eminasi lukejaanakinak kon akapongoru keng', bobo isonie nesi apua keng'.

¹⁵ Ebunete akwapin akiyong'o Lokapolon; ebunete ijakaa kere luka akwapin akiyong'o akibusesu keng'.

¹⁶ Ebuni Lokapolon akiduku bobo Sayon kiteteu, ebuni nesi akitodiar akibusesu keng'.

¹⁷ Ebuni nesi akiirar itung'a keng' lukinyekin, ka akiirar alipasia kes.

¹⁸ Kigirata nu esoma Lokapolon kanuka auri kana ebuut, tetere ebunete itung'a lu ering'a kidouna akiturite nesi.

¹⁹ Abu Lokapolon kong'oleu kwap alomun ka alaro keng' kanakalaunan kanako kuju, abu nesi kong'oleu kwap alomun kokuju.

²⁰ Abu nesi kiira apipilu naka lukejaasi aenis; kolacakini nesi kesi luketubokiite aario.

²¹ Kanuka ng'un ebunio alimonor ekiror keng' ko Sayon, bobo ebunio akiturite nesi ko Yerusalem,

²² apaki na etukokinototor akwapin ka ajakaanut kanuka akimaa Lokapolon.

²³ Ainaki Lokapolon akwana kang' anonoku aring'a eong' arait nikatumunan; etuurian nesi akijar kang'.

²⁴ Okwai Akuju kang', mam ayaar eong' kipokona aring'a eong' arait nikatumunan. Okwai Lokapolon, ijari ijo ikaru kere.

²⁵ Ibu ijo sek kojeu akwap, kuju erait asoma nuka akanin kon kelope.

²⁶ Ebunete kesi atubor konye ibuni ijo akideun; ebunete kesi kere adaun bala inapen. Ibuni ijo akinyekin kesi bala inapen, kosodete kesi atubor.

²⁷ Konye ijei ijo emam akibelosit, bobo emam akijar kon esial.

²⁸ Ebunete idwe ka lukejaanakinak kon akiboi kojokan; ebunete kesi akitolosite koking'aren keng'.