Isabulin 10 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka Adolite

¹ Okwai Lokapolon, inyo ilwanare ijo? Inyo ing'opitere ijo ijaasi siong' ocani?

² Ipogasi lukarokok ka akisicana lu epalipalito; kikam kesi kaloketa kanu etenata kesi.

³ Ipogasi lukarokok kanukarokok kanu ekotosi kesi; ilamete luka emwane ka aking'ere Lokapolon.

⁴ Mam lukarokok kepodosi kuju ka Lokapolon; kopogi kes itunenete ebe mam Akuju kejaasi ka adumunet.

⁵ Itolosito lukarokok kojokan kang'in ibore. Mam kesi kebeikinete akijen atubonokino ka Akuju; ijutanarete ipading'atin kes.

⁶ Elimonokinosi kesi ikulopek, “Mam oni cut kebirorosi; Mam oni cut kijaikinosi ocan.”

⁷ Ejori kes ileleba ilami, aliokonu ka akitukurian; ebenene kesi ejore akiro nuka areit kanukarokok.

⁸ Eng'opete kesi ka aduketa, idarito akiyara itung'a lu emam aronus apede. Eng'icete kesi lu emam kejaasi ka agogong' apede;

⁹ idarito kesi kama eng'opitotor kesi bala ing'atunyo. Eperete kesi idarito lukapalapalak; ikamete kesi kaloketa kes ka akiriar kesi.

¹⁰ Ipiricaro lu emam agogong'; elanya kesi agogong'u naka etyang'.

¹¹ Elimonokinosi lukarokok ikulopek, “Mam Akuju kepodo! Agolok akonyen keng' bobo mam cut kebuni anyun eong'!”

¹² Okwai Lokapolon, kitisila itung'a ng'ulu lukarokok! Kiitu ng'ulu lu icanasi!

¹³ Ikote itung'a lukarokok itamuto Akuju ai kosodete alimonokin ikulopek ebe, “Mam nesi kesicani eong'?”

¹⁴ Konye itee ijo; itee ijo atiokuso ka ican bobo ilokokina ijo ng'ini pak aking'arakin kesi. Lu emam kejaasi ka agogong' epiakisi akijar kes nama kon; ing'arak ijo ng'ini pak ng'ulu lu ejaasi ka akadadu.

¹⁵ Kobilbil agogong'u ka itung'a lukarokok; kitisila kesi kanuka aronus kana esomata kesi akitodol na emam kesi kisomakinata bobo.

¹⁶ Erait Lokapolon ejakait ikaru kere. Ng'ulu lu imaete akujun ace ewoliete ka akwap keng'.

¹⁷ Okwai Lokapolon, ibuni ijo apupun alipasia ka lukapalapalak ibuni ijo ainakin kesi akicata.

¹⁸ Inakini ijo ikokiok nepepe kalu inuyarite adolite tetere emam itung'a lu etwakete kebunete atukurian bobo.