Iromayon 9 - AKITUTUKET NAKITETET (NEPEPEKA ISABULIN KA AWARAGASIA)

Akuju kiton Itung'a keng'

¹ Enera eong' abeite kotoma Kristo. Mam eong' keng'alae. Kegang'ito eong' awoomisio kang' kotoma Emoyo Lokalaunan,

² na atemara eong' ekipone lo epolore akituuru kang', ekipone lo emamare apipilu kotau kang' esial

³ kanuka itung'a kang', akiring' kang' kelope kiton awokot kang'! Kanu kes kaminanari eong' cut kere ebe eong' elope kajii kwap kilami ka Akuju bobo ka agitara kamaka Kristo.

⁴ Eraito kesi itung'a ka Akuju. Abu nesi kitarau kesi idwe keng', kopukokini nesi kesi akibusesu keng'. Kigwaakini nesi akitutuket keng' ka kesi, koinakini nesi kesi Ekisil. Ejaasi kesi ka akimaa naka abeite. Adumutu kesi asumuneta ka Akuju,

⁵ elomuuto kesi kauri ka luka asonya ka Iburayon lu ejenuna. Bobo ejii Kristo ojautene loka etung'anane, erait nesi epe kama kes. Kituruoi Akuju lo ipugae iboro kere ikaru kere! Ikote nepeneni.

⁶ Mam eong' kabala ebe ebirori aitumunet ka Akuju. Naarai mere itung'a kere luko Israel nes eraito itung'a ka Akuju.

⁷ Bobo mere auri ka Aburaam kere nes erait idwe ka Akuju. Abu Akuju kolimoki Aburaam ebe, “Akitoro namaka Isaka nes idumuna ijo auri na esumunikiit eong' ijo.”

⁸ Apolou keng' erait ebe, idwe lu idouno kopone kaloka ng'ini paki, mam keraito idwe ka Akuju, konye idwe lu idouno atupa ka asumunet ka Akuju nes imario auri naka abeite.

⁹ Nu nes nu abala asumunet: “Akolong' bala na abong'uni eong' kosodi Sara adumun ikoku nisapat.”

¹⁰ Mere nu bon. Konye Rebeka de abu kodumu imwatok alomun kamaka papa kepe, Isaka loka asonya wok.

¹¹ Konye kanuka anyun ebe ejaasi Akuju ka alakakina naka aseun, atikere ering'a imwatok kidouna bobo ering'a kesi kebeikina akitegelikin nukajokak kamaka nukarokok,

¹² apon kolimokine Rebeka ebe, “Ebuni ikoku nikapolon akijaanakin nikaditan.” Kanuka ng'un, ekipone lo eseya Akuju etupasi ka ekipone lo enyarauna nesi elope, konye mere atupa ka asomisio ka etung'anan.

¹³ Kwape ebalatatar Agirasia Nukalaunak ebe, “Abu eong' kaminu Yakobo, konye kokadakini eong' Esau.”

¹⁴ Katemasi konye ebe mam Akuju kedolit? Mam cut.

¹⁵ Naarai abu nesi kolimoki Musa ebe, “Ajaikinosi eong' ka akisoni kamaka ng'ini kere kani aseuni eong'.”

¹⁶ Kanuka ng'unu, ng'in iboro mam ketupasi kanu ekote etung'anan asoma adepar asianut ka Akuju bon.

¹⁷ Elimonokinete agirasia nukalaunak Farao ebe, “Abu eong' ketarau ijo ejakait kanuka akitosoma ijo akitoduun agogong' kang' ka akisiarakin ekiror kang' akwap kere.”

¹⁸ Kanuka ng'unu, ejaasi Akuju ka asianut kamaka ng'in kere kani ekote nesi. Bobo, isicasi nesi etau kitwaan kere kani ekote nesi akisicata etau keng'.

Anyunyura kiton Akisoni ka Akuju

¹⁹ Kere ing'isi ijo eong' ebe, “Inyo bere ekounana Akuju adiakareta? Ing'ai epedori akirebokin nu ekote nesi akisomakin?”

²⁰ Konye ing'ai ijo, etung'anan along'u lo ibong'onokini Akuju? Ebeikiit ibore nikejeuno aking'it nikajaan nesi ebe, “Inyo kijeuna ijo eong' ekipone lo?”

²¹ Kong'in de, lokajaan amotio ejaasi ka adolit naka akitosoma elupe kwape itiminanariter nesi, ka ajeun amotio aare kamaka elupe kalope kang'oli, amot ape naka apaki kana eyong'ite noi, nace na itosomao kang'in pak.

²² Eputosi nu kanu esomaki Akuju. Akote nesi akitoduun anyunyura keng' ka akitejenuun agogong'u keng'. Konye atitiny nesi noi kakikanya kang'ulu kalu anyunyurakiit nesi, lu etemokina amudiar.

²³ Bobo, akote nesi akitoduun akibusesu keng' na apolo noi, na apon kobukokine oni lu abu nesi korimaki, oni lu adau nesi akitemonokin adumun akibusesu keng'.

²⁴ Naarai iraito oni itung'a lu abu nesi konyarau, mere alomun kamaka Iyaudin bon, konye kamaka Ilong'au de.

²⁵ Nu nes nu ebala nesi kokitabo ka Osea: “Itung'a lu amam araito lukang', anyarauni eong' kesi ‘Itung'a kang'.’ Akwap na amam eong' kamina, anyarauni eong' nesi, ‘Naminat kang'.’

²⁶ Kalaro kang'ipekang'ini nama kelimokinere kesi ebe, ‘Mam osi kiraito itung'a kang',’ nes enyaraunere kesi idwe ka Akuju kalo ejari.”

²⁷ Emonyi Isaya kuju ka Israel ebala: “Atikere kipuaka itung'a luko Israel bala asing'e kong'eleja kakare, idis bon nes eyuuno;

²⁸ naarai ebuni Lokapolon akisomakin atipet atubokino keng' cut ikamuut akwap kijokin.”

²⁹ Erait kwape kelimuuter Isaya sek ebe, “Kere kemam Lokapolon loka apedor kere kinyekiitere oni auri ace, tin oni kiputokinosi ka Sodom kiton Gomora.”

Akilip ka Paulo ikamuut Israel

³⁰ Kanuka ng'unu itemarete oni ebe Ilong'au lu amam atamakiito asoma nu edolito kamaka Akuju, apon kimarakine kesi eraito lu edolito koking'aren keng' akitoro akiyuun;

³¹ konye mam itung'a ka Akuju lu akotosi ekisil lokitemokina akimarakin kesi adolite koking'aren ka Akuju apotu kodumutu.

³² Inyo? Amam kesi akotosi akitor akiyuun konye akotosi bala ibore ni edumuno atupa kasoma kitwaan. Kopone kang'olo kigukisi kesi kuju ka “Amoru kana igukinikini”

³³ kana ebalasi agirasia kuju keng' ebe: “Kiteete, epiaki eong' Sayoni amoru na einakini itung'a aguinikin, amoru na ibirori kesi. Konye ng'ini kere ni iyuuni nesi mam nesi kekadakini.”