Iromayon 8 - AKITUTUKET NAKITETET (NEPEPEKA ISABULIN KA AWARAGASIA)

Akijar naka Emoyo

¹ Emam atubokino kipokona kamaka ng'ulu kalu ejarete kotoma akimorikikina ka Yesu Kristo.

² Naarai ekisil loka Emoyo lo kiinuni oni akijar kotoma akimorikikina ka Yesu Kristo, adau alakakin eong' kamaka ekisil kaloka aronus kiton atwanare.

³ Nu ekarikit Ekisil asoma kanuka anonoku ka ejautene ketung'anane, abu Akuju kisoma. Abu nesi kotubok aronus na kejii otung'anane kokipone kaloka akijukun Okoku keng', lo abuni kojautene bala etung'anan loka aronus kanuka adaun aronus.

⁴ Esomae Akuju nu tetere nu edolito nu ekote Ekisil isimonikino kojokan kotoma wok kalu ijarete, mere kagogong' ka etung'anan konye akitor apedor naka Emoyo.

⁵ Ng'ulu lu ejarete kwape ekotore ejautene kes loka etung'anane, eyait nu ekote etung'anane adama kes. Ng'ulu lu ejarete kwape elimonokina Emoyo kesi, Emoyo nes eyait adama kes.

⁶ Akipiakin adama oboro luka akwana erait atwanare, konye akipiakin adama oboro luka Emoyo eyauni akijar kiton aipuc.

⁷ Naarai adama nu ejaasi oboro luka akwana eding'asi ka Akuju. Mam keyong'it ekisil ka Akuju. Teni cut mam.

⁸ Ng'ulu lu eyong'ito nu ekotosi awate kes, mam kitalakarete Akuju.

⁹ Konye mam osi kijaasi toma awate kus. Ijaasi osi toma Omoyo, kere cut kejii Emoyo ka Akuju toma kus. Itwan kere ni mam kejaasi ka Emoyo ka Kristo mam kerait ni keng'.

¹⁰ Konye kiboe Kristo kotoma kus, atikere ketwakata awate kus kanuka aronus, ejarete imoyoi kus kanuka adolit.

¹¹ Kejii Emoyo ka Akuju, lokitajaruni Yesu kamaka lukatwaka toma kus, ebuni nesi lokitajaruni Kristo kamaka lukatwak ainakin awate kus nu etwakete akijar kopone kaloka ajalakin Emoyo keng' kama kus.

¹² Kanuka ng'un, ikanacan ka akinacan kang', ijaasi oni kanu itemokina asoma. Konye mere ayait akijar kwape ekotore ejautene ka etung'anane oni asoma.

¹³ Naarai kibooto osi kwape ekotore akwan, itwakete osi. Konye kere kiyarata osi asomisio kus ka apedor kanaka Emoyo, ibunete osi akijar.

¹⁴ Ng'ulu lu eyait Emoyo ka Akuju eraito idwe ka Akuju.

¹⁵ Naarai Emoyo lo ainaki Akuju osi mam kitarauni osi ibulesun ka ainakin osi akurianu. Konye kitarauni Emoyo osi idwe ka Akuju. Bobo kapedor ka Emoyo inyaraunete oni Akuju, “Papa! Papa kang'!”

¹⁶ Imorikikinosi Emoyo ka Akuju kiton imoyoi wok alimor ebe iraito oni idwe ka Akuju.

¹⁷ Kanu iraiteter oni idwe keng', idumunete oni asulwany na igwaikiit nesi itung'a keng'. Bobo idumunete oni nenipe ka Kristo nu igwaikiit Akuju nesi. Naarai kimorata oni icani ka Kristo, imorete oni akibusesu keng' de.

Aibuses na Ebuut

¹⁸ Anyuti eong' ebe icani lu icanasi oni apaki na mam cut kitupusio ka akibusesu na epukokino oni.

¹⁹ Idarito isuban kere kaminanar kopukoki Akuju idwe keng'.

²⁰ Naarai apon kigwakine isuban ojautene lo amamatatare kesi ajaatatare ka apedor cut, mere kamina kes. Konye esomao kong'in naarai arait amina Akuju. Konye kong'in de ejii amunokina,

²¹ naarai elakakino isuban ng'ulu de kamaka ebulesene kaloka atwanare, kosodete akimor alakakina naka idwe ka Akuju.

²² Ijenete oni ebe akitodol akolong' na, iboro kere lu esubite idinyasi kapipilu bala arieba naka akidoun.

²³ Konye mere iboro lu esubite bon idinyasi. Konye oni de lu ijaasi ka Emoyo lu iraito idutan lusodit ka Akuju idinyasi kotawon wok idarito oni Akuju kitarau oni idwe keng' ka alakakin ejautene wok kere.

²⁴ Arait kanuka amunokina nes kiyuunere oni. Konye kianyutu oni nu imunokiito oni, mam kerait amunokina naka abeit. Naarai ng'ai kama wok emunokiit ibore ni iteete oni?

²⁵ Konye kimunokisi oni ibore ni mam oni kiteete, idaraunete oni ka atitinyu.

²⁶ Kokipone kalope kang'oli nesi ebunia Emoyo de aking'arakin oni atikere kinonok oni. Naarai mam oni kijenete ekipone lo itemokinare oni akilip. Ilipakiit Emoyo elope oni kamaka Akuju karieba kana emam akiro kepedorete atemar.

²⁷ Konye Akuju lo itee itawon wok, ejeni nu itunene Emoyo. Naarai imaimai Emoyo Akuju ikamuut itung'a keng' bobo atupa ka amina keng'.

²⁸ Ijenete oni ebe kakiro kere isomae Akuju nukajokak kotung'a kalu eminasi nesi, kotung'a kalu anyarau nesi kwape kekotore nesi.

²⁹ Ng'ulu lu kedau Akuju aseun sek abu nesi kogita awai kanuka araun bala Okoku keng', tetere Okoku keng' erauni onaci ekiyai kokinacan kalu ipu.

³⁰ Kanuka ng'unu, ng'ulu lu abu Akuju kogita awai, abu nesi konyarau. Ng'ulu lu abu nesi konyarau, abu nesi kimaraki kesi eraito lu edolito koking'aren keng'. Bobo abu nesi komorata ka kesi akibusesu keng'.

Amina ka Akuju kotoma Yesu Kristo

³¹ Atupa kanu kere, inyena konye itemarete oni? Kejii bere Akuju wai wok, ng'ai ebeikini akitepege oni?

³² Mere Akuju lo amam abu kogwouna Okoku keng' kelope. Konye kolemuni nesi Okoku keng' kanu wok! Koinakini nesi oni Okoku keng'. Teni mam nesi keinakini oni iboro kijokin along'u?

³³ Ng'ai iwosae itung'a lu eseut Akuju? Atiaku Akuju elope ebe emam kesi aronus!

³⁴ Ng'ai etubokini kesi? Mere Yesu Kristo lo abu kotwana kere lo etajaruno kamaka lukatwak bobo iboe ka akan kanakoteten ka Akuju, ilipi koking'aren keng' kanu wok!

³⁵ Ng'ai konye ebeikini akitiaka oni kamaka amina ka Kristo? Ebeikinete ican teni, teni ebeikini akicasite ka akijar, kere akisicanio, kere eteng'e, kere apalupalut, kere akang'as kere atwanare?

³⁶ Kwape ebalatatar agirasia nukalaunak ebe, “Kanu kus aput siong' atwakare akolong' kijokin. Eyaite siong' bala amerekekin nu eyaite nama ejeng'iere kesi,”

³⁷ Mam, koboro kalu kere, idumutu oni akilanya akitor nama keng' kalo abu kominu oni!

³⁸ Naarai ajeni eong' cut ebe, emam ibore ipede ebeikini akitiaka oni kamaka amina keng'. Mere atwanare kere de akijar. Mere imalaikan kere de ice lu ipugaete kokuju, mere lolo kere de irwaru,

³⁹ mere akwap na ejii kuju kere de akwap nako kwap. Emam ibore ni esubite ni ebeikini akitiaka oni kamaka amina ka Akuju kana erait na wok akitoro namaka Yesu Kristo Lokapolon wok.