Iromayon 6 - AKITUTUKET NAKITETET (NEPEPEKA ISABULIN KA AWARAGASIA)

Atwanite kotoma Aronus, konye Akijar kotoma Akimorikikina ka Kristo

¹ Inyena konye itemarete oni? Ketolositete akiboi kotoma arokusio tetere iyatakin asianut ka Akuju?

² Mere kong'in! Itwakata oni ikamuut asoma aronus. Ikote konye oni lu ipotu kotwakata ikamuut asoma arokusio itolosoti akiboi karokusio ai?

³ Mam osi kijenete ebe oni kijokin lu apon kibatisai kotoma Yesu Kristo, ebatisao oni akimor ka atwanare keng'?

⁴ Kanuka ng'un apon konuka oni nepepe ka nesi na ebatisaere oni akibatisao naka akimor atwanare keng', tetere ibeikinete oni de ajaikin akijar nakitetet kwape kitajarunere Kristo kamaka lukatwak kapedor kanaka akibusesu naka Papa.

⁵ Naarai kimorikikiite oni nepepe ka nesi katwanare bala nakeng' tar cut kimorikikine oni ka nesi kakitajaruno bala nakeng'.

⁶ Ijenete oni ebe apon kibubukine omusalaba ejautene wok lo mojong' nepepe ka Kristo tetere emudiaro akwan naka arokusio komam oni bobo kiraunete ijoloi luka arokusio.

⁷ Naarai nesi ni atwana elakakino nesi alomun kapedor karonus.

⁸ Konye kitwakito oni nepepe ka Kristo, imunokito oni ebe ibunete oni akiboi ka nesi.

⁹ Naarai ijenete oni ebe nakedaunere akitajarun Kristo alomun kamaka lukatwak, mam nesi ketwani bobo. Mam atwanare kejaasi ka apedor bobo kama keng'.

¹⁰ Atwanare na atwani nesi arait na ikamuut aronus, kape bon komam akinyogokin. Konye kipokona ejari nesi akijar keng' naka akimoro ka Akuju.

¹¹ Kanuka ng'un, ejii osi de akijene ebe itwakito osi ikamuuti asoma aronus, konye ijarete osi kotoma akimorikikina ka Akuju akitoro namaka Yesu Kristo.

¹² Mam bobo aronus akipuga awate kus nu etwakete, ka ainakin osi iyong'ito nu eminasi awate kus.

¹³ Kere de mam ajalakin alaro apede naka awate kus kitosoma aronus bala iboro luka arokusio. Konye, koinakisi Akuju awate kus kwape ka itung'a kalu ayaun toma akijar alomun kamaka lukatwak. Bobo kolemutu awate kus kamaka ka Akuju kitosomae bala iboro lu edolito.

¹⁴ Mam aronus kitemokina akipuga osi naarai mam osi kijaasi kwap ka ekisil konye ijaasi osi kwap ka asianut.

Ibulesun luka Adolite

¹⁵ Inyena konye? Ketolototo asoma aronus kanu imamare oni kijaasi kwap ka ekisil konye kwap ka asianut ka Akuju? Mam cut!

¹⁶ Abeite ijenete osi ebe kilemunosi osi ikulopek bala ibulesun lu iyong'ara, iraito osi ibulesun ka ejakait kalo iyong'ito osi, atikere kerait loka aronus lo eyari itung'a atwanare, eyong'ite lo eyari itung'a toma adolite.

¹⁷ Konye keyalamikisi Akuju! Teni ace pak kiraito osi ibulesun luka aronus, konye iyong'ata osi kipokona kitawono kus kere abeite na edumun kotoma akisisianakino kana ipotu osi kidiautu.

¹⁸ Apon kolakune osi kotoma aronus kosodete osi araun ibulesun luka adolite.

¹⁹ (Etosomae eong' ang'ajepe naka ng'in paaran kanuka akilajakina kus ka ikulopek). Apak ape ipotu osi ikulopek kolemunosi cut araus ibulesun luka aronus, kiton iponosio lukarokok kanuka asoma nukarokok. Kokipone kalope kang'oli ejii osi alemuni cut araus ibulesun lu edolito kanuka asoma iboro lu edolito.

²⁰ Apaki na iraiteter osi ibulesun luka aronus, ilakakina osi ilwaka osi kadolit.

²¹ Anyena adumunet kipotu osi kodumutu kasoma iboro lukiinakito osi kipokona asilut? Esial ka iboro kang'ulu erait atwanare.

²² Konye kilakakiite osi kipokona karonus, karaun osi ibulesun ka Akuju, araitoit na idumunete osi erait akijar naka alemuna akijaanakin Akuju cut cut. Esial keng' erait akijar na emam kedaun.

²³ Naarai eropit ka aronus erait atwanare. Konye idutat nika along'u nika Akuju erait akijar na emam esial kotoma Yesu Kristo Lokapolon wok.