Iromayon 5 - AKITUTUKET NAKITETET (NEPEPEKA ISABULIN KA AWARAGASIA)

Adolite kamaka Akuju

¹ Kipokona kwape kedaunere akitodolikin oni koking'aren ka Akuju akitoro akiyuun, ijaasi oni ka aipuc nepepe ka Akuju akitoro namaka Yesu Kristo Lokapolon wok.

² Akitoro akiyuun wok adau nesi ayaun oni toma ojautene lo loka asianut ka Akuju nama ijaasi oni kipokona. Kanuka ng'unu ipogasi oni kanuka amuno kana ijaasi ka oni naka akimor akibusesu ka Akuju!

³ Idelasi oni bobo kanuka atiokusio wok, naarai ijenete oni ebe atiokusio eurunete atitinyu,

⁴ atitinyu euruni acamuno naka Akuju na edumun kedau nesi akitama oni, acamuno keng' euruni amunokina.

⁵ Amunokina na mam kitakadakini oni, naarai abuku Akuju amina keng' otawon wok akitoro Emoyo Lokalaunan, lo erait edutat ka Akuju kama wok.

⁶ Naarai ering'a oni ibwalara, abu Kristo kotwana kanuka lukarokok kakolong' kana aseut Akuju.

⁷ Icasit atwanare itwan kanuka itwan kani edolit. Kere ebeikini itwan ice ang'asikin atwanare kanuka itwan kani ejokuna.

⁸ Konye etodiki Akuju oni ekipone lo eminare nesi oni. Ering'a oni iraito luka arokusio nes ketwania Kristo kanu wok!

⁹ Akitor awokot keng' nes imariere kipokona idolito oni koking'aren ka Akuju. Etiae ali cut konye eyuuna nesi oni kamaka anyunyura ka Akuju!

¹⁰ Iraito oni sek ipading'atin ka Akuju. Konye abu nesi kitarau oni ipoupatin keng' akitoro atwanare ka Okoku keng'. Kanu konye iraitotor oni kipokona ipoupatin ka Akuju, ekipone ali cut kiyuunere oni akitoro akijar ka Kristo!

¹¹ Konye mere ng'un bon. Ijaasi siong' ka ailel kanu esoma Akuju akitoro namaka Lokapolon wok Yesu Kristo, lo etarau oni ipoupatin ka Akuju.

Adam kiton Kristo

¹² Abunete arokusio akwapa akitoro namaka etwan ka epe, koyaunete arokisio keng' atwanare. Kanuka ng'un, esiarakin atwanare namaka etung'anan kere naarai esoma ng'in itwan aronus.

¹³ Ajii aronus akwap sek ering'a keyauna Ekisil. Konye mam kiitunono arokusio kemam ekisil.

¹⁴ Konye alomun apak ka Adam adolore apak ka Musa epugae atwanare itung'a kere, atikere ng'ulu lu kemam kisomato aronus kwape kisomater Adam nakeng'eria nesi akiyong' acorasia ka Akuju. Arait Adam aputo naka ng'oli kalokitemokina abunore.

¹⁵ Konye iare ng'ulu mam keputosi, naarai idutat ka Akuju nika along'u mam keputosi ka aronus ka Adam. Erait abeite ebe apotu itung'a lu ipu kotwakata kanuka aronus ka etwan kang'olo ka epe. Konye asianut ka Akuju epolo noi. Ekipone lope ng'olo nes epolore idutat keng' kamaka itung'a kalu ipu akitoro asianut ka etwan ka epe, Yesu Kristo.

¹⁶ Ejii agelakinet kiding' ka idutat ka Akuju kiton arokusio ka etwan kepe. Kau ka aronus ka ape, kobuni atubokino naka “Ni ediakarit.” Konye kau ka arokusio kanu ipu, kobuni idutat ni mam kitemokina adumun nika akimarakino ebe “Mam kadiakarit!”

¹⁷ Erait abeit ebe akitor aronus ka etwan ka epe nes ageuna atwanare akipuga kanuka etwan kang'olo kepe. Konye ipuaka koni nu edumunosi kasoma kanu kebu etwan epe, Yesu Kristo kisoma! Ng'ulu kere lu edumunete asianut ka Akuju na epolo, kimarakinete kesi along'u lu edolito koking'aren keng', ebunete akipuga kakijar akitoro namaka Kristo.

¹⁸ Kanuka ng'un, kwape ketubokina aronus ape itung'a kere, ekipone lope ng'olo nes ebunia asomisit ape na edolit alakun itung'a kere ka ainakin kesi akijar.

¹⁹ Kwape kitaraunere akwap ka itung'a luka arokusio akitoro anwang'ite ka etwan kepe, nes imarakinere akwap ka itung'a lu edolito koking'aren ka Akuju akitoro akiyong' ka etwan kepe.

²⁰ Ayauno Ikisila kanuka akiyatakin arokusio. Konye nama eyatakin aronus, abu asianut ka Akuju kiyatakin adepar.

²¹ Kanuka ng'un, kwape kipuga aronus kokipone kaloka atwanare, nes ekipone ipuga asianut ka Akuju akitoro adolite, eyait oni toma akijar na emam kedaun akitor namaka Yesu Kristo Lokapolon wok.