Iromayon 4 - AKITUTUKET NAKITETET (NEPEPEKA ISABULIN KA AWARAGASIA)

Akitupuset naka Aburaam

¹ Inyena konye itemarete oni kuju ka Aburaam, papa wok? Inyena kebu nesi koanyu?

² Kere kitodolikiite nesi koking'aren ka Akuju kanuka asoma keng', tin nesi ejaasi ka ibore ni ipogare nesi, konye mere kakonyen ka Akuju.

³ Ebalasi agirasia nukalaunak ebe, “Eyuut Aburaam Akuju, bobo kanuka akiyuun keng' kocamuni Akuju nesi bala lo edolit.”

⁴ Ng'ulu lu isomaete eropio kesi, konye mam eropit ng'olo kerait idutan, konye aropetait keng'.

⁵ Konye ng'ulu lu iteete akiyuun, mere asomisio, bobo lu iyuuto Akuju lo erimakini ng'ulu lu ediakarito ka araun lu mam kediakarito, erait akiyuun na nes itee Akuju tetere imarakini nesi edolito kesi koking'aren keng' kelope.

⁶ Na nes apolou kanukinerit Daudi nakineritere nesi kuju ka alakara ka itwan kani emaraki Akuju adolit, konye amam nesi esomae tetere edumuni nesi amina ka Akuju.

⁷ “Erereng' ng'ulu lu arimakin adiakareta kes, ng'ulu lu arapakin arokusio kes!

⁸ Erereng' itwan ni emam Akuju kiituni arokusio keng'!”

⁹ Erait alakara na nakinerit Daudi kuju keng' naka ng'ulu bon kalu ekepite? Mam cut! Erait naka ng'ulu de kalu mam kekepite. Naarai ilimosi oni agirasia nukalaunak nu ebalasi ebe, “Abu Aburaam komunoki Akuju. Kanuka akiyuun keng' kocamuni Akuju nesi erait lo edolit.”

¹⁰ Iwori kisomakinototor nu? Kerait ering'a kere kedaun akikepe Aburaam? Kerait ering'a, mere kedaun.

¹¹ Akepio nesi kokau, bobo akepio keng' arait akitodiaret nakitodikiit ebe kanuka akiyuun keng' abu Akuju kocamu nesi bala lo adolit ering'a kekepa nesi. Kanuka ng'unu erait Aburaam papa loka akiyuun kang'ulu kere kalu iyuuto Akuju bobo kimarakiite nesi kesi bala lu edolito atikere kemam kekepite kesi.

¹² Bobo erait nesi papa kes kalu ekepite, ng'ulu lu ekipite bobo kojaasi toma akijar naka akiyuun na abu papa wok Aburaam kotup ering'a kekepia nesi.

Idiauno Asumunet ka Akuju kotoma Akiyuun

¹³ Nakisumunikina Akuju Aburaam kiton luka auri keng' ebe erauni akwap nakeng', abu nesi kisoma kong'in, mere kanu keyong'itere Aburaam Ekisil, konye kanuka akiyuun keng' bobo kocamunete nesi bala lo edolit kamaka Akuju.

¹⁴ Kere cut ainakin ng'ulu lu igwapito Ekisil nu isumunikini Akuju, tin akiyuun emam kejaasi ka adumunet ka apede, bobo komam ajokun apede.

¹⁵ Eyauni Ekisil kwap anyunyura ka Akuju. Konye nama emam Ekisil, emam akibil ekisil.

¹⁶ Kanuka ng'unu agong'akina asumunet na namaka akiyuun, tetere imarakino asumunet erait idutat ka Akuju nika along'u kamaka auri ka Aburaam kere, mere kamaka ng'ulu bon kalu eyong'ito Ekisil, konye kamaka ng'ulu de kalu iyuuto kwape kiyuutere Aburaam. Naarai erait Aburaam papa wok kere loka akiyuun.

¹⁷ Kwape ebalatatar Agirasia Nukalaunak ebe, “Etarau eong' ijo papa loka akwapin kanu ipu.” Kanuka ng'unu ejokuna asumunet kakonyen ka Akuju, kalo abu Aburaam kiyu, Akuju lo itajaruni lukatwak bobo lo einakini akicorasit keng' ibore ng'ini ni amam kejii etakanuuni.

¹⁸ Abu Aburaam kiyuu ka amunokin, atikere nakemamar atenikina naka amunokin. Kanuka ng'unu korauni nesi “Papa loka akwapin kanu ipu.” Kwape ebalatatar agirasia nukalaunak ebe, “Epuakarosi auri kon bala akanyer.”

¹⁹ Apiarit nesi ikaru akwatat. Konye mam akiyuun keng' abu kilajakin kiitu nesi kuju ka akwana keng', na asiit bala etwanit kere de kuju ka abeite ebe amam Sara abeikini akidore idwe.

²⁰ Mam akiyuun keng' akinyekin nesi, bobo mam nesi abu kobuonok asumunet ka Akuju. Abu akiyuun keng' kilelebik nesi agogong'u, kosodi nesi akitur Akuju.

²¹ Ajeni nesi cut ebe ebeikini Akuju asoma nukisumunikiit nesi.

²² Ng'ini nesi atenikina kecamuna Akuju Aburaam erait lo edolit.

²³ Akiro nu ebalasi, “Abuni kocamune nesi bala lo edolit” Amam kigirite kanu keng' bon.

²⁴ Kigirite kanu wok de, kalu itemokina acamuno iraito lu edolito, kalu iyuuto nesi lo etajaruni Yesu Lokapolon wok alomun kamaka lukatwak.

²⁵ Kanuka arokusio wok, apon kwaarai nesi, kitajarunete nesi tetere imarakino oni lu idolito koking'aren keng'.