Iromayon 3 - AKITUTUKET NAKITETET (NEPEPEKA ISABULIN KA AWARAGASIA)

¹ Ejaasi Iyaudin konye ka ajokun apede akilanya Ilong'au? Kere de ejii adumunet apede naka akepio?

² Abeite, ejii adumunet ng'olo wai! Nasodit, abu Akuju koinaki Iyaudin akirot keng'.

³ Konye abo kere kemam ice kama kes kemunokina? Itodiarito nu ebe ideun Akuju emam kejaasi ka amunokina?

⁴ Teni mam! Tar koraite Akuju loka abeite, atikere kerait ng'in itwan iliokoi. Kwape ebalatatar Agirasia Nukalaunak ebe, “Tar kitodikine ijo ajaus ka adolite inera ijo; Tar ijo akilanya kiwosai ijo.”

⁵ Konye abo kitodutu cut kotenan asomisio wok nukarokok ebe isomae Akuju kadolite, inyena itemarete oni? Itemarete oni ebe emam nesi adolite kitisila nesi oni?

⁶ Aliokonu! Kemam Akuju kedolit, ikoni nesi ebeikini atubonokin akwapa ai?

⁷ Konye abo keinu aliokonu kang' Akuju akibusesu kokipone kaloka akitodiar abeite keng' kojokan? Inyo konye itolositere atubonokin eong' bala nikarokusio?

⁸ Inyo konye mam atemar konye ebe, “Kesomata nukarokok tetere ebunete nukajokak?” Teni, karatata eong' itung'a ice cut, ka akiwosa eong' kanuka ejore ibore enipe eni! Ebunio atubokin kesi kwape ekotokinar.

Emam ni edolit

⁹ Inyena konye? Iraito oni Iyaudin lukajokak kopone kijokin akilanya Ilong'au? Mam cut! Adau eong' akitodiar ebe Iyaudin kiton Ilong'au ejaasi kwapa ka agogong'u ka aronus.

¹⁰ Kwape ebalatatar Agirasia Nukalaunak ebe; “Emam ipede ni edolit,

¹¹ emam ipede ni eco kere de ni imae Akuju.

¹² Apaata itung'a kere korotin ka Akuju; apayasi kesi kere, emam ipede ni isomae nu ideerete, atikere ipe.

¹³ Ileleba akiro kes ka aliokonu kana ari; Ikokorunun aliokonu alomun ka ang'ajepa kes, ka akitukurian bala asorit naka emun, alomun kopono kes,

¹⁴ Ileleba ejori kes ka ilami lu epipil.

¹⁵ Eburuburete kesi akikang'as ka akiyara,

¹⁶ nama kere elosete kesi, inyenikinete kesi arokusio kiton atwakisia.

¹⁷ Ering'a kesi kejenuna eroto loka aipuc,

¹⁸ Bobo mam kesi kisisiauto acoite Akuju.”

¹⁹ Kipokona idautu oni ajenun ebe ng'in ibore ko Okisil ikamuut ng'ulu lu iboete kotoma Okisil, kanuka akirebokin akimonyo kere naka etung'anan kiton ayaun akwapa kere atubokino ka Akuju.

²⁰ Naarai emam itwan ipede ni imarakino edolit kakonyen ka Akuju kanuka asoma nu ecamakiit ekisil. Nu isomae Ekisil erait akitodikin itung'a ebe esomata kesi aronus.

Epone lo itodolikina Akuju itung'a

²¹ Konye kipokona adaun akitoduun ekipone lo imarakina Akuju itwan adolite koking'aren keng' kilope. Mam kejaasi ka ibore ipede kani ikamuut Ekisil, atikere kedaut Ekisil ka Musa kiton ikadwarak alemun akitodiaret kes.

²² Imaranakini Akuju itung'a adolite akitoro akiyuun kes kotoma Yesu Kristo. Isomanakini Akuju ng'ulu kere lu iyuuto Kristo nu, naarai emam agelakinet cut.

²³ Esoma ng'ini itwan aronus, bobo alwanaari kamaka Akuju kalo eyuunene.

²⁴ Konye, kanuka asianut kana erait idutat ka Akuju nika along'u, imarakino itung'a kijokin adolite koking'aren keng' akitor namaka Yesu Kristo, kalo elakanakini kesi.

²⁵ Abu Akuju kolemu Yesu tetere akitoro awokot keng' erauni nesi eroto lo erimakinere itung'a arokusio kes kanuka akiyuun kes nesi. Esoma Akuju nu tetere itodiari nesi ebe edolit nesi. Kokolong' sek atitinyi Akuju, emam apodo arokusio ka itung'a.

²⁶ Konye kakolong' kana, isomakini Akuju ibore ikamuut arokusio kes tetere itodiari nesi adolite keng'. Kokipone kang'olo itodiari Akuju elope ebe edolit nesi, bobo imarakini nesi ng'ini kere ni emunokiit Yesu adolite.

²⁷ Inyena konye ibeikiiteter oni akipogare? Emam ibore ipede! Inyena atenikina kanu? Kayong'ata Ekisil? Mam, konye ebe kanuka akiyuun wok.

²⁸ Idautu oni atiakun ebe itwan imarakino adolite koking'aren ka Akuju akitor akiyuun bon, konye mere kanuka asoma nu icorakiit Ekisil.

²⁹ Kere erait Akuju loka Iyaudin bon? Mam nesi kerait Akuju loka Ilong'au de? Eebo, erait.

³⁰ Erait Akuju epe, bobo imarakini nesi edolito Iyaudin koking'aren keng' akitor akiyuun kes. Imarakini nesi edolito Ilong'au koking'aren keng' akitor akiyuun kes.

³¹ Itodikiito nu ebe kanuka akiyuun kana, kocakare konye Ekisil? Mam, mam cut. Konye iyong'ito oni Ekisil.